Presidenti i Shteteve të Bashkuara, Donald Trump, deklaroi të mërkurën gjatë samitit të NATO-s se ka urdhëruar Sekretarin e Thesarit, Scott Bessent, të ndërpresë të gjitha marrëdhëniet tregtare me Spanjën, duke e cilësuar Madridin si “një partner të tmerrshëm” në aleancë.
Duke folur përkrah Sekretarit të Përgjithshëm të NATO-s, Mark Rutte, në hapje të samitit në Ankara, Trump tha se nuk dëshiron që SHBA-ja të zhvillojë më asnjë aktivitet tregtar me Spanjën.
“Spanja nuk bie dakord për asgjë dhe nuk duhet ta mbani mbi supe”, tha Trump, duke iu drejtuar Rutte.
Më pas ai iu kthye Sekretarit të Thesarit, Scott Bessent, dhe deklaroi: “Nuk dua të bëj asnjë tregti me ta, në rregull?”. Bessent iu përgjigj: “Po, zoti President.”
Trump vazhdoi me tone të ashpra: “Zbatoje menjëherë. Mos fol fare me ta. Janë të pashpresë. Janë njerëz të këqij. Ata fitojnë shumë para nga ne dhe do të sigurohemi që të fitojnë shumë më pak. Nuk dua asnjë biznes me ta”.
Presidenti amerikan ka shprehur vazhdimisht pakënaqësi ndaj Spanjës, e cila nuk ka pranuar objektivin e ri të NATO-s për të shpenzuar 5% të Prodhimit të Brendshëm Bruto për mbrojtjen. Gjithashtu, qeveria socialiste e Madridit refuzoi t’i lejonte SHBA-së përdorimin e hapësirës ajrore dhe bazave ushtarake spanjolle gjatë konfliktit me Iranin.
Megjithatë, Shtetet e Bashkuara vazhdojnë të kenë dy baza ushtarake strategjike në Spanjë: Naval Station Rota dhe Morón Air Base.
Sipas raportimeve, një dokument i brendshëm i Pentagonit kishte shqyrtuar edhe mundësinë e ndëshkimit të aleatëve të NATO-s që, sipas Uashingtonit, nuk mbështetën operacionet amerikane kundër Iranit, përfshirë edhe pezullimin e mundshëm të Spanjës nga Aleanca. Këto masa nuk janë konfirmuar si politikë zyrtare.
