Presidenti amerikan Donald Trump tha të martën se mori një letër nga presidenti ukrainas Volodymyr Zelensky, në të cilën lideri ukrainas shprehu gatishmërinë për të ardhur në tryezën e bisedimeve për luftën Rusi-Ukrainë.
“Ukraina është gati të vijë në tryezën e bisedimeve sa më shpejt të jetë e mundur për të sjellë paqen e qëndrueshme më afër. Askush nuk dëshiron paqe më shumë se ukrainasit”, tha Trump në një fjalim para Kongresit të martën, duke cituar letrën.
Trumpi tha gjithashtu se ai kishte qenë në “diskutime serioze me Rusinë” dhe “kishte marrë sinjale të forta se ata janë gati për paqe”.
“A nuk do të ishte e bukur?” tha ai. “Është koha për të ndaluar këtë çmenduri. Është koha për të ndalur vrasjet. Është koha për t’i dhënë fund kësaj lufte të pakuptimtë. Nëse doni t’i jepni fund luftërave, duhet të flisni me të dyja palët”.
Trumpi pritej të përshkruante më tej planet e tij për Ukrainën dhe Rusinë në fjalimin në Kongres, por nuk zbuloi detaje të mëtejshme se si ai planifikon t’i japë fund konfliktit më të madh të Evropës që nga Lufta e Dytë Botërore.
Trump tha se Ukraina ishte gati të nënshkruante një marrëveshje mineralesh me SHBA-në, për të cilën Uashingtoni thotë se është thelbësore për të siguruar mbështetjen e vazhdueshme të SHBA-së për mbrojtjen e Ukrainës.
Katër burime i thanë Reuters se administrata Trump dhe Ukraina planifikojnë të nënshkruajnë marrëveshjen në këmbim të ndihmës ushtarake, të cilën Trump e ka ndërprerë. Por më vonë të martën, Sekretari i Thesarit i SHBA-së, Scott Bessent tha për Fox News, “Nuk ka asnjë nënshkrim të planifikuar”, sipas një postimi në X nga një gazetar i Fox, transmeton Klankosova.tv.
Trumpi nuk dha detaje të mëtejshme mbi marrëveshjen e mineraleve, duke e lënë të paqartë fatin e saj.
Herët të martën, Zelensky u zotua të riparojë marrëdhëniet me SHBA-në pas asaj që ai e përshkroi si një përplasje “të penduar” në Zyrën Ovale me Trumpin javën e kaluar.
Zelensky tha se donte t’i “bënte gjërat në rregull” dhe ishte gati “në çdo kohë dhe në çdo format të përshtatshëm” për të nënshkruar marrëveshjen e mineraleve, të cilën ai e la në tryezë gjatë një vizite në Uashington pas debatit të Zyrës Ovale me Trumpin.
