Türkiye tha se zbatimi i plotë i të gjitha fazave të marrëveshjes së armëpushimit në Gaza ndërmjet grupit palestinez Hamas dhe Izraelit është “thelbësor”, transmeton Anadolu.
“Në procesin vijues, është thelbësore që të gjitha fazat e marrëveshjes të zbatohen plotësisht, armëpushimi të bëhet i përhershëm dhe ndihma humanitare të dërgohet urgjentisht në Gaza”, tha Ministria e Jashtme turke në një deklaratë, duke shprehur mirënjohje për vendet ndërmjetësuese, veçanërisht Katarin dhe Egjiptin, për përpjekjet e tyre.
Komuniteti ndërkombëtar duhet të sigurojë që Izraeli të përmbushë përgjegjësitë e tij lidhur me këto çështje, vuri në dukje ministria.
Paqja dhe stabiliteti i qëndrueshëm në Lindjen e Mesme varen nga arritja e paqes në Palestinë dhe përfundimi i padrejtësisë së duruar nga populli palestinez, theksoi ajo.
Bisedimet e paqes duhet të fillojnë pa vonesë për të krijuar një shtet të pavarur, sovran dhe të lidhur të Palestinës përgjatë kufijve të vitit 1967, me Kudsin Lindor si kryeqytet, tha ministria.
“Türkiye do të vazhdojë të mbështesë popullin palestinez në periudhën në vijim”, shtoi ajo.
Më herët, kryeministri i Katarit dhe ministri i Punëve të Jashtme Sheikh Mohammed bin Abdulrahman njoftoi arritjen e një marrëveshjeje për armëpushim në Rripin e Gazës, duke theksuar se zbatimi i saj do të fillojë këtë të dielë.
