Presidenti ukrainas Volodymyr Zelenskyy u kërkoi diplomatëve të lartë evropianë të mbështesin krijimin e një gjykate të posaçme për të ndjekur penalisht zyrtarët e lartë rusë, përfshirë presidentin Vladimir Putin, transmeton Anadolu.
“Sot, pikërisht para jush, është një vendim: të krijohet një mekanizëm që mund të ndihmojë në parandalimin e luftërave të ardhshme nëpërmjet llogaridhënies. Vendim për të formuar një gjykatë. Dhe ju bëj thirrje ta mbështesni këtë vendim politikisht”, tha Zelenskyy në një fjalim me video-konferencë në një takim të ministrave të jashtëm të BE-së në Lviv, qytet perëndimor i Ukrainës.
Zelenskyy theksoi se një gjykatë e fortë mund dhe duhet “ta bëjë çdo agresor potencial të mendojë dy herë”, dhe kjo mund të arrihet “nëse të gjithë ata që vlerësojnë jetën njerëzore ngrihen për jetën”.
“Ju falënderoj ju dhe vendet tuaja që punuat së bashku për të ndërtuar infrastrukturën e drejtësisë që na nevojitet – për të siguruar llogaridhënie për këtë luftë, luftën e Rusisë kundër Ukrainës”, tha ai, duke theksuar se Rusia “do të mbahet përgjegjëse” për konfliktin.
Zelenskyy vazhdoi duke thënë se ky është një detyrim moral për Evropën dhe “të gjithë në botë që vlerësojnë jetën njerëzore”.
Presidenti ukrainas tha gjithashtu se dëshira për t’i dhënë fund konfliktit në vazhdim, i cili tani është në vitin e katërt, duhet të jetë brenda Rusisë, duke shprehur mirënjohjen e vendit të tij për mbështetjen mbrojtëse të Evropës për Kievin.
Gjatë shekujve, “ndryshimet e pamatura dhe të gabuara e kanë tronditur dhe madje e kanë shkatërruar Evropën”, shumë herë, tha ai.
Dhe tani, në këtë moment vendimtar në histori, “është jetike për të gjithë ne, për çdo komb, që Evropa të mos shpërbëhet përsëri. Jo këtë herë”, shtoi Zelenskyy.
Delegacione nga 35 vende dhe Këshilli i Evropës u mblodhën në Lviv më herët sot për të diskutuar mbështetjen e mëtejshme për Ukrainën dhe gjykatën e propozuar. Takimi përkoi me paradën ushtarake vjetore të Ditës së Fitores të Rusisë në Moskë, ku u përkujtua 80-vjetorin e fitores sovjetike në Luftën e Dytë Botërore.
