Presidenti i Ukrainës, Volodymyr Zelensky, u takua sot në kryeqytetin turk me Presidentin Rexhep Tajip Erdogan, përpara një raundi të mundshëm bisedimesh paqeje me Rusinë dhe SHBA-në që pritet të zhvillohen në Stamboll.
Në pallatin presidencial në Ankara, Erdogan e priti Zelensky-n me një ceremoni zyrtare dhe roje nderi.
Pas takimit, Zelensky u shpreh se hapat e ardhshëm të Ukrainës drejt një marrëveshjeje paqeje do të varen nga rezultatet e diskutimeve me udhëheqësin turk.
“Delegacioni rus që ka mbërritur duket më shumë si një rekuizitë teatri sesa një përpjekje serioze për paqe,” tha Zelensky gjatë një deklarate për mediat në aeroportin e Ankarasë, duke kritikuar mungesën e Presidentit rus Vladimir Putin në bisedimet e propozuara në Turqi.
Putini nuk mori pjesë në negociatat e planifikuara dhe, sipas zyrtarëve ukrainas, kjo mungesë është interpretuar si një sinjal se Moska nuk e merr seriozisht përpjekjen për një zgjidhje diplomatike të konfliktit.
Nërkohë, ende nuk dihet se kush do e përfaqësojë Ukrainën në bisedime me delegacionin rus, raporton BBC.
Ndërkohë, Ministri i Jashtëm turk, Hakan Fidan, shprehu shpresën për një kthesë pozitive. “Tani, pas tre vitesh vuajtjesh të pafundme, më në fund ka një dritare mundësie,” tha ai gjatë një takimi të NATO-s që po mbahet paralelisht në Turqi. “Bisedimet… shpresojmë se mund të hapin një kapitull të ri.”
Turqia ka mbajtur një rol ndërmjetësues në të kaluarën mes palëve ndërluftuese dhe mbetet një aktor kyç në përpjekjet për ndaljen e luftimeve.
