Rreth 500 serbë të Kosovës raportohet se kanë shkuar në Beograd në mbështetje të presidentit serb Aleksandër Vuçiç para protestës së radhës nga studentët që pritet të mbahet të shtunën.
Sipas Institutit për Studime të Luftës Hibride “Octopus”, këta njerëz janë kushtëzuar të shkojnë në Beograd dhe janë të njëjtit që paguhen nga Serbia në emër të ndihmave sociale. Gjithashtu, ata paguhen deri në 100 euro në baza ditore për qëndrim atje. Megjithëse shteti i Kosovës nuk ua ndalon dot pjesëmarrjen, nga organet e sigurisë kërkohet që të njëjtit të mbahen nën mbikëqyrje, shkruan A2 CNN.
“Ata persona t’i identifikojë, organet e sigurisë duhet ta kenë këtë parasysh, pastaj t’i mbajnë nën vëzhgim ata persona dhe aktivitetet e tyre, se çfarë mund të ndodhë dhe eventualisht, nëse aktiviteti i tyre verifikohet që janë kriminale dhe gjykatat në Kosovë verifikojnë që qytetarët e Kosovës mund të bëjnë veprime kriminale në një shtet tjetër apo brenda vendit, atëherë mund të merren edhe veprime ligjore ndaj tyre,” tha Gurakuç Kuçi nga Instituti “Octopus”.
Shfrytëzimi i serbëve të Kosovës nuk po ndodh për herë të parë, madje ka rrënjë shumë kohë më parë. “Më kujton kohën e Millosheviçit, ku po të njëjtit, i njëjti regjim, i kishte keqpërdorur, apo i kishte përdorur për qëllime të veta për shtrirjen e autoritetit të tij dhe për aneksimin e plotë të institucioneve të Kosovës, por edhe viseve të tjera të ish-Jugosllavisë, dhe të njëjtën gjë, të njëjtën politikë po e përdor ish-ministri i tij [Aleksandër Vuçiç],” tha Avni Islami, ekspert i sigurisë.
Në Kosovën pas luftës, trazirat që ndodhnin kryesisht në pjesën veriore, sipas njohësve të sigurisë, organizoheshin nga të njëjtit njerëz që sot i dalin në mbrojtje Vuçiçit nga protestat e studentëve. Sirenat që ndizeshin dikur në pjesën veriore ishin sinjali që të gjithë duhet të dilnin në rrugë për protesta dhe bllokada.
“Një pjesë e tyre janë besnikë të Vuçiçit, të cilët së bashku janë të inkriminuar në krim të organizuar, pastaj një pjesë e tyre janë të varur kryesisht nga pensionet, nga pagat që vijnë nga Serbia, dhe një pjesë tjetër janë të manipuluar nga Vuçiçi,” tha Avni Islami, ekspert i sigurisë.
“Janë njerëz të cilët paguhen vazhdimisht nga Serbia për të bërë veprime mercenare të tilla, sepse nuk janë qytetarë të thjeshtë ata që marrin shkopin dhe dalin të sulmojnë dikë nga pjesëtarët e KFOR-it, apo diçka të tillë. Edhe nëse do të dilnin në protestë, nuk janë të trajnuar që të ushtrojnë dhunë,” tha Gurakuç Kuçi nga Instituti “Octopus”.
Pavarësisht pjesëmarrjes së serbëve në mbrojtje të Vuçiçit, ekspertët e sigurisë sugjerojnë se shumica e serbëve lokalë të Kosovës po ia kthejnë shpinën presidentit serb. Në anën tjetër, Vuçiçit i duhen serbët e Kosovës për të dërguar një mesazh të brendshëm që ai kujdeset për Kosovën dhe se me rënien e tij do të bjerë edhe Kosova, sipas besimit të tyre. Ndërsa për ndërkombëtarët, i shfrytëzon për të dëshmuar se është ai faktori i paqes dhe që mban serbët nën kontroll.
“Paqja e rajonit dhe e Kosovës është akoma në duar të mia, dhe nëse unë nuk kontrolloj serbët e Kosovës, ata mund të revoltohen dhe të shkaktojnë luftëra të reja në Ballkan. Po ashtu, mund të kërkojë çështje të tjera të lëshimit në negociata ndërmjet Kosovës dhe Serbisë dhe të bëj presion te negociatorët, por edhe te vendet perëndimore për të bërë presion ndaj Kosovës për ndryshimet territoriale dhe qëllime të tjera,” tha Gurakuç Kuçi nga Instituti “Octopus”.
Studentët në Serbi kanë që nga nëntori që protestojnë pas tragjedisë në Novi Sad. Protesta të ngjashme, por dukshëm me numër më të ulët të pjesëmarrësve, u organizuan edhe në Mitrovicë të Veriut. Disa të rinj nga veriu i Kosovës, përmes rrjeteve sociale, kanë paralajmëruar se do të jenë pjesë e protestës së studentëve më 15 mars në Beograd./A2
