Ministri i Punëve të Brendshme, Xhelal Sveçla ka reaguar pas aksionit të Policisë së Kosovës dhe Administrtatës Tatimore të Kosovës në veri të vendit ku janë mbyllur gjashtë njësi të të ashtuquajturës Bankë Postare e Kursimeve, përcjell KosovaPost.
Me anë të një postimi në Facebook, ai ka përgëzuar institucionet për bashkëpunimin dhe suksesin e tregaur.
“Me qëllim të vendosjes së ligjshmërisë, pas komunikimit dhe kërkesës së institucioneve relevante dhe autorizimit të prokurorit, Policia e Kosovës në bashkëpunim me Administratën Tatimore të Kosovës, në katër komunat në veri të Kosovës ka realizuar sot operacionin e kontrollit dhe mbylljes së 6 njësive të të ashtuquajturës Bankë Postare e Kursimeve (Banka Postanske Stedionica) si institucion i jashtëligjshëm financiar i Serbisë në Republikën e Kosovës.”, ka shkruar Sveçla.
“Sundimi i rendit dhe ligjit, shërbimi ndaj të gjithë qytetarëve pa asnjë dallim do të vazhdojë të jetë qëllimi ynë për të cilin jemi zotuar në vazhdimësi.”, shtoi ai.
