Sulmuesi më i ri i Liverpoolit, suedezi Alexander Isak, nuk pritet të jetë në dispozicion të plotë kundër Kosovës.
Kosova dhe Suedia do të përballen të hënën (8 shtator) në “Fadil Vokrri” në kuadër të kualifikimeve për Kupën e Botës.
Trajneri i kombëtares së Suedisë (Blagult), Jon Dahl Tomasson, ka thënë se Alexander Isak nuk do të jetë lojtar 90-minutësh kundër Sllovenisë dhe Kosovës.
“Nuk do të bëjmë asnjë budallallëk me të”, tha Tomasson.
“Ai nuk ka pasur një parasezon me shumë stërvitje dhe ndeshje. Ai nuk mund të luajë 90 minuta. Ne kemi një plan. Ai është i lumtur që është këtu”, potencoi trajneri i Suedisë.
Ai pretendon se Liverpooli nuk ka dhënë asnjë udhëzim se si duan që “Blagult” ta trajtojë sulmuesin, por pranon se ekipi kombëtar është në dialog me gjigantin e Premier Ligës në nivele të ndryshme.
Për shembull, Dahl Tomasson ka qenë në kontakt me menaxherin e Liverpoolit, Arne Slot.
Më parë, mbrojtësi i Leeds, Gabriel Gudmundsson, ka qenë një lloj pikëpyetjeje përpara ndeshjes hapëse kualifikuese të Kupës së Botës kundër Sllovenisë të premten, pasi ai u zëvendësua në ndeshjen e fundit të ligës. Por tani Dahl Tomasson jep një mesazh qetësues.
“Ai është mirë”, thotë danezi.
Isak nuk ka luajtur ndeshje dhe as nuk është stërvitur me skuadrën e Newcastle gjatë verës, për shkak se ishte në grevë para transferimit te Liverpool.
Në ditën e fundit të afatit, të hënën, marrëveshja u arrit. Kjo e bën Isakun blerjen më të shtrenjtë të Premier League ndonjëherë dhe deri tani suedezin më të shtrenjtë të të gjitha kohërave. Tarifa e transferimit raportohet të jetë rreth 150 milionë euro.
