Ambasadori i Gjermanisë në Kosovë, Rainer Rudolph, ka deklaruar se procesi zgjedhor që po zhvillohet sot në vend po kalon në mënyrë të qetë dhe pa probleme.
Përmes një video-mesazhi, Rudolph bëri të ditur se po merr pjesë në monitorimin e zgjedhjeve në kuadër të misionit të organizuar nga Zyra e Bashkimit Evropian në Prishtinë, së bashku me katër ekipe vëzhguese.
“Përshëndetje, sot është dita e zgjedhjeve në Kosovë dhe, me vendosmërinë për të vëzhguar procesin, po marrim pjesë me katër ekipe në ushtrimin e monitorimit të zgjedhjeve të organizuar nga Zyra e Bashkimit Evropian në Prishtinë. Aktualisht jam duke vizituar qendrat e votimit në Prishtinë dhe rrethinën e saj. Gjithçka që kam parë deri tani duket e qetë dhe po zhvillohet pa probleme. Prandaj, presim me interes rezultatet e zgjedhjeve sonte. Shihemi atëherë”, tha ambasadori gjerman.
Ai theksoi se deri në momentin e deklarimit të tij, procesi i votimit në qendrat që kishte vizituar po zhvillohej normalisht, ndërsa shprehu pritjen për rezultatet që do të publikohen pas mbylljes së votimit.
