Sipas një analisti izraelit, grupi palestinez Hamas nuk tregon shenja dorëzimi në Rripin e Gazës dhe grupi ka “mësuar të kalojë në luftë guerile në rajon”, transmeton Anadolu.
Në një artikull analitik për të përditshmen “Yedioth Ahronoth”, Avi Issacharoff tha se divizioni 162 i ushtrisë izraelite po vepron në veri të Gazës, përfshirë në kampin e refugjatëve Jabalia, në “një përpjekje për të shkatërruar infrastrukturën e Hamasit atje”.
“Problemi i madh është se për ta bërë këtë duhet të goditni çdo shtëpi që dyshohet se përmban tunele ose aktivitet armiqësor”, tha Issacharoff.
Analisti izraelit e përshkroi zonën si një zonë fatkeqësie, pa njerëz në rrugë dhe madje edhe qen endacakë që kanë mbetur pasi nuk ka ushqim.
Më shumë se tre muaj më parë, Izraeli nisi ofensivën ushtarake në shkallë të gjerë në Jabalia, duke shkaktuar zhvendosjen e dhjetëra mijëra palestinezëve, duke shkatërruar shumë ndërtesa dhe duke shkaktuar mijëra viktima.
Palestinezët akuzojnë Izraelin se synon të pushtojë zonën dhe ta kthejë atë në një zonë tampon, si dhe t’i detyrojë banorët të largohen përmes bombardimeve të pamëshirshme dhe një rrethimi të rreptë duke i privuar ata nga ushqimi, uji dhe ilaçet.
Issacharoff tha se është e vështirë të shihet një fund i kësaj lufte, me muaj luftime përpara vetëm për të kontrolluar veriun e Gazës.
Kostoja për sa i përket viktimave, veçanërisht ushtarëve, theksoi Issacharoff, gjithashtu është e konsiderueshme dhe Hamasi nuk tregon shenja dorëzimi.
Sipas analistit izraelit, Hamasi ka mësuar të përshtatet me luftën guerile në të gjitha aspektet, duke operuar në një zonë të shkatërruar ku ushtria izraelite vendosë shumë e më shumë forca.
Issacharoff tha se për sa kohë nuk ka qeverisje alternative në Gaza, Hamasi do të vazhdojë të rivendosë forcat në të gjithë zonat e enklavës.
Që nga 7 tetori i vitit 2023, ushtria izraelite vazhdon me luftën gjenocidale në Rripin e Gazës duke vrarë të paktën 45.500 palestinezë, kryesisht gra dhe fëmijë, pavarësisht rezolutës së Këshillit të Sigurimit të OKB-së që bën thirrje për armëpushim të menjëhershëm.
Në muajin nëntor, Gjykata Ndërkombëtare Penale (GJNP) lëshoi urdhër-arreste për kryeministrin izraelit, Benjamin Netanyahu dhe ish-ministrin e Mbrojtjes, Yoav Gallant, duke i akuzuar për krime lufte dhe krime kundër njerëzimit në Gaza.
Izraeli për luftën vdekjeprurëse në Gaza gjithashtu përballet me një çështje gjenocidi në Gjykatën Ndërkombëtare të Drejtësisë (GJND).
