Një person është arrestuar në Prizren nën dyshimin për falsifikim të dokumenteve dhe mashtrim, pas një hetimi të përbashkët të Prokurorisë Themelore në Prizren dhe Policisë së Kosovës.
I arrestuari, me inicialet I.Ç., dyshohet se, në cilësinë e pronarit dhe personit përgjegjës të një Qendre për Verifikim të Aftësive Profesionale në Prizren, ka lëshuar diploma të aftësimit profesional për profesione të ndryshme, pa u zhvilluar trajnimet përkatëse teorike dhe praktike.
Sipas Prokurorisë, në diploma ishte paraqitur se trajnimet ishin përfunduar me sukses, ndërsa dokumentet dyshohet se janë përdorur për punësim brenda dhe jashtë vendit, si dhe për plotësimin e kritereve në procedura të ndryshme të prokurimit.
Nga hetimet dyshohet se, nga viti 2019 deri më tani, janë lëshuar rreth 1,679 diploma, ndërsa pagesa për një diplomë dyshohet se ishte rreth 300 euro. Përfitimi nga kjo veprimtari të dyshuar kundërligjshme vlerësohet në rreth 500 mijë euro.
Pas veprimeve hetimore, Gjykata Themelore në Prizren kishte lëshuar urdhër për kontrollin e subjektit, i cili u realizua në bashkëpunim me inspektorët tatimorë.
Gjatë kontrollit, sipas Prokurorisë, janë gjetur dhe sekuestruar 333 diploma profesionale, të vulosura dhe të pavulosura, dy pajisje kompjuterike me program për regjistrimin e diplomave, dy USB me të dhëna, tri vula të biznesit, një telefon mobil i të dyshuarit, 11 fleta me shënime për borxhet dhe pagesat, 630 euro para të gatshme dhe nëntë kartëvizita të biznesit.
Hetimet kanë ngritur dyshime se subjekti nuk ka qenë i akredituar nga Autoriteti Kombëtar i Kualifikimeve (AKK) dhe nuk ka qenë i autorizuar për ofrimin, vlerësimin dhe certifikimin e kualifikimeve profesionale.
I dyshuari është ndaluar për 48 orë. Prokuroria ka bërë të ditur se, brenda afatit ligjor, do të vlerësojë paraqitjen e kërkesës për caktimin e masës për sigurimin e pranisë së të pandehurit në procedurën penale.
