Agjencia e Ushqimit dhe Veterinarisë (AUV) ka zhvilluar një inspektim të jashtëzakonshëm në fabriken e qumeshtit “VITA” që merret me përpunimin e qumështit dhe prodhimin e produkteve të qumështit, ku janë konstatuar mospërputhje me legjislacionin në fuqi dhe janë marrë mostra për analiza laboratorike.
Sipas AUV-së, gjatë kontrollit janë marrë mostra të qumështit UHT me afat të gjatë përdorimi, si dhe mostra të qumështit pluhur dhe vajit të palmës, të cilat janë dërguar për analiza laboratorike.
Inspektorët kanë verifikuar dokumentacionin, kanë kryer kontroll fizik të objektit dhe kanë inspektuar linjat e prodhimit. Gjatë këtij procesi është konstatuar se operatori ushtron veprimtarinë e përpunimit të qumështit në bazë të autorizimit përkatës, por në objekt janë instaluar edhe linja për prodhimin e produkteve me origjinë shtazore dhe me bazë qumështi, duke përdorur qumësht pluhur, vaj palme dhe lëndë të tjera ndihmëse.
AUV njofton se subjekti disponon sasi të konsiderueshme të lëndëve të para dhe produkteve, përfshirë qumësht UHT, qumësht pluhur, proteina qumështi, hirrë qumështi dhe vaj palme.
Sipas komunikatës, është konstatuar gjithashtu se subjekti nuk posedon autorizim të veçantë për prodhimin dhe përpunimin e produkteve me bazë yndyrash bimore dhe proteinash qumështi për qëllimet e deklaruara në etiketim, ndërsa disa elemente të procesit do t’i nënshtrohen vlerësimit të mëtejshëm nga autoritetet kompetente.
AUV thekson se në këtë fazë nuk është marrë vendim për mbylljen e subjektit. Inspektimi, sipas agjencisë, është kufizuar në verifikim dhe marrje mostrash, ndërsa konstatimet përfundimtare do të bëhen vetëm pas pranimit të rezultateve laboratorike.
Pas përfundimit të procedurës inspektuese, subjektit i është lënë vendim për zbatimin e kërkesave të legjislacionit në fuqi dhe udhëzimeve të Ministrisë së Bujqësisë, Pylltarisë dhe Zhvillimit Rural.
Agjencia rithekson se mbrojtja e shëndetit publik dhe siguria ushqimore mbeten prioritet institucional, ndërsa veprimet e mëtejshme administrative dhe ligjore do të varen nga rezultatet e analizave laboratorike.
