Ministri në detyrë i Infrastrukturës dhe Transportit, Dimal Basha, ka njoftuar se ka nisur asfaltimi i një pjese të magjistrales në Ferizaj, ndërsa ka bërë të ditur se njëri prej segmenteve pritet të përfundojë dhe të hapet për qarkullim më 5 shtator 2026, transmeton KosovaPost.
Basha ka thënë se punimet e asfaltimit kanë nisur nga Ura e Vogël, te Mobileria Migros, në drejtim të restorantit “Ballkani”, ndërsa sot ka qenë personalisht në terren për të përcjellë nga afër ecurinë e punimeve.
Sipas tij, traseja e segmentit nga rruga “Driton Islami” deri te restoranti “Ballkani” pritet të përfundojë me të dyja shtresat e asfaltit dhe të jetë e hapur për qarkullim më 5 shtator.
Pas përfundimit të këtij segmenti, punimet e asfaltimit do të vazhdojnë nga rruga “Driton Islami” në drejtim të rrugës “Vëllezërit Gërvalla”.
Ndërkohë, Basha ka bërë të ditur se po punohet intensivisht edhe në segmentin nga rruga “Vëllezërit Gërvalla” drejt Urës së Madhe, ku punimet janë drejt finalizimit.
Ministri në detyrë ka theksuar se synimi është që punimet të zhvillohen sipas planit, në mënyrë që të lehtësohet qarkullimi në këtë pjesë të Ferizajt dhe të krijohen kushte më të mira për qytetarët dhe bizneset.
“Po angazhohemi që punimet të ecin sipas planit, në mënyrë që ta lehtësojmë sa më shpejt qarkullimin dhe bizneset tona në Ferizaj të kenë një rrugë moderne dhe me cilësi të lartë!”, ka shkruar Basha.
