Bashkimi Evropian (BE) dhe NATO filluan Task-Forcën e përbashkët për të eliminuar mangësitë dhe për të identifikuar kërcënimet ndaj infrastrukturës kritike, transmeton Anadolu Agency (AA).
Presidentja e Komisionit Evropian, Ursula von der Leyen, dhe Sekretari i Përgjithshëm i NATO-s, Jens Stoltenberg bënë një deklaratë për media para pjesëmarrjes në takimin e anëtarëve të Komisionit Evropian për mbrojtjen dhe sigurinë.
Von der Leyen njoftoi se kanë formuar një task-forcë të përbashkët ku ekspertët e BE-së dhe NATO-s do të identifikojnë kërcënimet ndaj infrastrukturës kritike dhe zonat strategjikisht të brishta, si dhe do të punojnë për eliminimin e tyre.
Ekspertët në fazën e parë do të fokusohen në fushat e transportit, energjisë, dixhitalizimit dhe hapësirës, si dhe gjetjet e tyre lidhur me këto do t’i ndajnë me anëtarët e BE-së dhe NATO-s, deklaroi Von der Leyen, duke informuar se ndarja e informacionit dhe eksperiencës si dhe paralajmërimi i hershëm do të jetë baza e partneritetit.
Von der Leyen më tej njoftoi se në takimin me temë mbrojtjen dhe sigurinë ku do të merr pjesë edhe Stoltenberg, do të diskutohet mbështetja që do të jepet për Ukrainën në çdo fushë, si dhe kërcënimet mbi Evropën.
Stoltenberg, duke rikutuar se dje BE dhe NATO nënshkruan deklaratën e përbashkët për të çuar bashkëpunimet e tyre në një nivel më të lartë, tha se do të punojnë së bashku në fusha të tilla si konkurrenca gjeopolitike në rritje, teknologjitë që kërcënojnë sigurinë dhe efektet negative të ndryshimeve klimatike ndaj sigurisë.
Stoltenberg bëri të ditur se Task-Forca NATO-BE e filluar sot, synon që infrastrukturën kritike, teknologjinë dhe zinxhirët furnizues t’i bëjë më të qëndrueshëm kundër kërcënimeve të mundshme, duke theksuar rëndësinë e dhënies së mbështetjes ndaj Ukrainës.
Stoltenberg, më tej tha se mirëpret vendimin e SHBA-së, Francës dhe Gjermaninë për të dhënë mjete luftarake të këmbësorisë dhe tanke të lehta.
