Presidenti i Turqisë, Recep Tayyip Erdogan, ka dënuar ashpër veprimet ushtarake të Izraelit në Gaza, duke akuzuar qeverinë izraelite për sulme pa dallim ndaj palestinezëve.
Ai kritikoi “heshtjen e bashkësisë ndërkombëtare”.
“Qeveria izraelite, në një gjendje të çmendurisë së plotë, po masakron pa dallim palestinezët”, tha Erdogan gjatë një takimi të grupit parlamentar pro-palestinez në Stamboll.
Ai theksoi se në mesin e të vrarëve ka edhe gazetarë dhe fëmijë, ndërsa “media globale dhe luftëtarët e të drejtave të njeriut heshtin”.
Bëhet e ditur se Erdogan gjithashtu kritikoi vendet perëndimore për ato që ai i quajti standarde të dyfishta, shkruajnë mediat e huaja, përcjell Telegrafi.
“Ata vendosin shpejt sanksione për incidentin më të vogël. Por unë pyes – ku janë ata tani kur bëhet fjalë për Izraelin?”, theksoi ai.
Sipas liderit turk, “gati 60,000 palestinezë, kryesisht gra dhe fëmijë, ishin vrarë brutalisht që nga 7 nëntori 2023.
Ai paralajmëroi se “çdo propozim që përfshin dëbimin e palestinezëve nga toka e tyre mijëvjeçare nuk ka asnjë vlerë”.
Ndër tjera, akuzoi ata që “heshtin për vrasjet në Gaza” se përpiqen të “normalizojnë gjenocidin” duke etiketuar rezistencën palestineze si “terrorizëm”.
“Vëllezërit dhe motrat tona në Gaza dhe Palestinë janë ekspozuar ndaj një prej grabitjeve më të mëdha për gati njëqind vjet”, tha ai.
Presidenti turk vuri në dukje se ai me keqardhje, me një “zemër të plagosur”, duhet të thotë se “bota islame ka dështuar të përmbushë atë që pritej prej saj në lidhje me Gazën”
