Britania i bëri Tel Avivit të respektojë integritetin territorial të Sirisë dhe paralajmëroi se sulmet izraelite rrezikojnë të destabilizojnë më tej vendin e shkatërruar nga lufta, transmeton Anadolu.
“Sulmet e Izraelit në Siri thuhet se kanë vrarë civilë dhe rrezikojnë të destabilizojnë më tej Sirinë”, shkroi në X Hamish Falconer, ministër për Lindjen e Mesme.
Ai i bëri thirrje Izraelit që “të adresojë kërcënimet legjitime të sigurisë përmes diplomacisë”.
“Një Siri e qëndrueshme është në interes të gjithë rajonit”, tha Falconer.
Të mërkurën, avionët luftarakë izraelitë kryen një seri sulmesh ajrore duke synuar disa vende në kryeqytetin sirian Damask dhe provincat perëndimore Hama dhe Homs.
Ushtria izraelite pretendoi se sulmet goditën “aftësitë ushtarake të mbetura” në bazën ajrore të Hamës dhe bazën T4 në Homs, së bashku me infrastrukturën tjetër ushtarake në Damask.
Ushtria izraelite kreu gjithashtu një ofensivë tokësore në Daraa në Sirinë jugore, ku sipas autoriteteve lokale u vranë të paktën nëntë persona.
Pas rënies së regjimit të Bashar al-Asadit në dhjetor, Izraeli zgjeroi pushtimin e Lartësive të Golanit sirian duke pushtuar zonën tampon të çmilitarizuar, një veprim që shkeli një marrëveshje mosangazhimi të vitit 1974 me Sirinë.
Sipas raporteve, Izraeli përfitoi nga rënia e regjimit për të kryer qindra sulme që synonin objektet dhe asetet ushtarake në gjithë Sirinë, duke përfshirë avionët luftarakë, sistemet raketore dhe instalimet e mbrojtjes ajrore.
