Një nga shtigjet më mbresëlënëse të ecjes në Evropë po tërheq gjithnjë e më shumë vizitorë nga e gjithë bota. “Majat e Ballkanit” përshkon rreth 190 milje nëpër Shqipëri, Kosovë dhe Mal të Zi, duke kaluar nëpër Malet e Nemuna.
Shtegu kalon nëpër kufijtë e tri vendeve dhe, në disa raste, një ditë ecjeje mund të përfshijë kalime nga një shtet në tjetrin. Megjithatë, ajo që e bën këtë rrugë të veçantë është natyra e paprekur, majat gëlqerore, liqenet akullnajore, livadhet me lule të egra dhe pyjet e dendura.
Edhe pse emri “Malet e Nemuna” mund të tingëllojë frikësues, sot kjo zonë konsiderohet ndër hapësirat më të egra dhe më të ruajtura të Evropës. Shtegu është bërë veçanërisht i njohur pas viteve të fundit, duke tërhequr turistë që kërkojnë aventura larg turizmit masiv.
Një sfidë për ecësit
“Majat e Ballkanit” nuk kërkon aftësi profesionale në alpinizëm, por është larg të qenit një shëtitje e lehtë. Ngjitjet janë të pjerrëta dhe shtegu ka një ngritje kumulative prej rreth 35 mijë metrash, ndaj kërkohet përgatitje e mirë fizike.
Ecja mund të përfundojë brenda rreth 10 ditësh, ndërsa shtegu mund të ndahet edhe në etapa më të shkurtra.
Një nga pikat më të bukura është Liqeni Hrid në Mal të Zi, i vendosur mbi 1,000 metra mbi nivelin e detit. Uji i kaltër, pyjet përreth dhe peizazhi malor e bëjnë atë një prej ndalesave më mbresëlënëse të gjithë itinerarit.
Nga zonë e izoluar në destinacion turistik
Shtegu kalon nëpër zona që për pjesën më të madhe të shekullit XX ishin të izoluara për shkak të zhvillimeve politike dhe luftërave në Ballkan.
Në Shqipëri, udhëtarët mund të shohin ende bunkerët e ndërtuar gjatë regjimit komunist të Enver Hoxhës. Për dekada, kufijtë e zonës ishin të mbyllur dhe lëvizja ishte shumë e kufizuar.
Kur u krijua në vitin 2006, itinerari u promovua edhe si “shtegu i paqes”, me synimin për të ndryshuar perceptimin ndërkombëtar për Ballkanin dhe për të treguar një anë tjetër të rajonit.
Rruga përfshin edhe disa nga zonat më të bukura malore të Kosovës, duke kaluar nga Dobërdoli në Milishevc, e më pas drejt Rekës së Allagës dhe Kuçishtës, shkruan CNN, transmeton Klankosova.tv
Pikërisht këto pjesë ofrojnë pamje të jashtëzakonshme të bjeshkëve dhe mundësi për të njohur nga afër jetën tradicionale të banorëve të zonave malore.
Një prej veçorive të shtegut është mikpritja. Udhëtarët ndalen në bujtina familjare, ku shërbehen ushqime tradicionale dhe produkte të përgatitura nga vetë familjet.
Turizmi po ndryshon jetën e banorëve
Zhvillimi i shtegut ka sjellë edhe përfitime ekonomike për banorët lokalë. Familje që dikur mbështeteshin kryesisht në bujqësi dhe blegtori kanë nisur të ardhura të reja përmes turizmit.
Në Vusanje të Malit të Zi, një prej pronarëve të bujtinave tregon se numri i vizitorëve është rritur ndjeshëm vitet e fundit.
Edhe në Shqipëri, banorët e zonave të thella kanë investuar në bujtina dhe ambiente për turistët, duke e kthyer turizmin malor në një burim të rëndësishëm të ardhurash.
Ende larg turizmit masiv
Pavarësisht rritjes së numrit të vizitorëve, “Majat e Ballkanit” mbetet kryesisht larg turizmit masiv. Sezoni kryesor zgjat nga qershori deri në shtator, ndërsa muajt e tjerë mund të jenë më të vështirë për shkak të borës dhe kushteve të motit.
Shtegu është gjithashtu relativisht dobët i sinjalizuar në disa pjesë, ndaj një guidë profesionale mund të jetë një zgjedhje e dobishme për ata që nuk e njohin terrenin.
Një aventurë që bashkon tri shtete
“Majat e Ballkanit” kalon nëpër Theth, Valbonë, Çerem, Dobërdol, Milishevc, Rekën e Allagës, Kuçishtë, Babino Polje, Plavë dhe Vusanje, përpara se të rikthehet drejt Thethit.
Përtej sfidës fizike, shtegu ofron një përvojë të rrallë: në vetëm disa ditë, udhëtari mund të përjetojë natyrën e egër, historinë, kulturën dhe mikpritjen e Shqipërisë, Kosovës dhe Malit të Zi.
Me peizazhet e saj spektakolare dhe karakterin ende të paprekur, “Majat e Ballkanit” po shndërrohet në një prej destinacioneve më të veçanta të ecjes në distanca të gjata në Evropë.
