Zhvillimet e fundit në Kosovë kanë shtuar edhe më shumë reagimet kundër planit për hapjen e një konsullate serbe në Shkodër. Teksa në Zubin Potok vazhdojnë gërmimet për gjetjen e trupave të viktimave të luftës dhe dyshohet për një varrezë masive me 23 civilë shqiptarë të vrarë nga forcat serbe, deri tani janë gjetur mbetjet mortore të gjashtë personave, transmeton Kosova Post.
Gjatë operacionit janë sekuestruar edhe armë, ndërsa është arrestuar një ish-pjesëtar i Armatës Jugosllave. Këto zhvillime kanë rikthyer në qendër të debatit plagën ende të hapur të krimeve të luftës dhe fatin e mbi një mijë e pesëqind personave që vazhdojnë të figurojnë të zhdukur.
Pikërisht në këtë klimë ka reaguar edhe deputetja e pavarur e Kuvendit të Shqipërisë, Marjana Koçeku. Ajo e ka cilësuar të papranueshme nismën për hapjen e një konsullate serbe në Shkodër, duke theksuar se nuk mund të ndërtohen gjeste normalizimi diplomatik me një shtet që ende nuk ka dhënë llogari për krimet e kryera në Kosovë, nuk ka kërkuar falje dhe vazhdon të mos zbardhë fatin e mijëra të zhdukurve. Sipas saj, kujtesa historike, dinjiteti i viktimave dhe drejtësia duhet të jenë mbi çdo interes politik apo diplomatik.
Koçeku ka ngritur pyetjen se çfarë mesazhi u përcillet familjeve që prej më shumë se një çerek shekulli kërkojnë eshtrat e më të dashurve të tyre, nëse në të njëjtën kohë Shqipëria flet për hapjen e një konsullate serbe në Shkodër. Ajo ka vlerësuar se fqinjësia e mirë nuk mund të ndërtohet duke anashkaluar të vërtetën dhe përgjegjësinë për krimet e luftës, ndërsa ka shprehur mbështetje për reagimin qytetar dhe protestën e paralajmëruar në Shkodër kundër kësaj nisme.
