Hysnie Dema ka njoftuar se ka dhënë dorëheqje nga pozita e kryetares së Nëndegës 5 të Forumit të Gruas të Lidhjes Demokratike të Kosovës (LDK) në Podujevë, si dhe nga pozita e anëtares së Kryesisë së Forumit të Gruas.
Dema, e cila thotë se ka qenë e angazhuar për më shumë se 10 vjet në LDK dhe në Forumin e Gruas, ka bërë të ditur se vendimi i saj lidhet me, siç shprehet ajo, një “zhgënjim të madh” ndaj mënyrës së udhëheqjes dhe qëndrimit të kryetares së Forumit të Gruas, Jehona Lushaku.
“Pas më shumë se 10 vitesh angazhim, përkushtim dhe kontribut, nuk e shoh më veten pjesë të kësaj strukture dhe nuk dëshiroj të vazhdoj një angazhim ku nuk ndihem e vlerësuar dhe e respektuar”, ka deklaruar Dema.
Ajo ka theksuar se, nga dita e sotme, nuk është më pjesë e Forumit të Gruas të LDK-së në Podujevë.
Dema ka bërë të ditur se vendimi është i menduar dhe përfundimtar.
