Presidenti francez, Emmanuel Macron, ka shpallur zyrtarisht një ligj që u jep disa pacientëve të drejtën për vdekje të asistuar, pas vitesh debatesh publike dhe parlamentare, raportoi media vendase të mërkurën, transmeton Anadolu.
Legjislacioni u publikua në Fletoren Zyrtare pasi Këshilli Kushtetues e miratoi javën e kaluar, me disa rezerva, sipas transmetuesit francez BFMTV.
Sipas ligjit, pacientët që plotësojnë kushtet do të lejohen të vetadministrojnë një substancë vdekjeprurëse në prani të një profesionisti shëndetësor. Një profesionist mjekësor mund ta administrojë substancën vetëm nëse pacienti është fizikisht i paaftë për ta bërë këtë.
Duhet të plotësohen njëkohësisht disa kushte. Pacienti duhet të jetë i rritur, të ketë shtetësi franceze ose statusin e rezidentit afatgjatë dhe të vuajë nga një sëmundje “e rëndë dhe e pashërueshme” në fazë të avancuar ose terminale.
Pacienti duhet gjithashtu të përjetojë vuajtje fizike të padurueshme dhe të jetë në gjendje të marrë dhe të shprehë një vendim të informuar deri në momentin e fundit.
Legjislacioni u miratua përfundimisht nga parlamenti në mes të korrikut. Megjithatë, profesionistët shëndetësorë nuk do të mund ta zbatojnë ligjin derisa qeveria të publikojë dekretet e nevojshme zbatuese.
Franca i bashkohet një grupi relativisht të vogël vendesh që lejojnë një formë të vdekjes së asistuar, përfshirë Belgjikën, Holandën, Zvicrën, Kanadanë dhe Uruguain.
Këshilli Kushtetues vendosi të premten se asnjë nga dispozitat e ligjit nuk cenon Kushtetutën.
Macron e mirëpriti vendimin, duke thënë se ai përmbyll “një debat demokratik shembullor”.
Ish-deputeti i Lëvizjes Demokratike Olivier Falorni, i cili hartoi projektligjin, e përshkroi miratimin e tij si “përparim të madh që më në fund po bëhet realitet”.
Legjislacioni është përballur gjithashtu me kundërshtim të fortë nga grupet fetare, disa profesionistë shëndetësorë dhe organizata që shprehin shqetësime për ndikimin e mundshëm te personat e cenueshëm.
Pesë kërkesa të veçanta për shqyrtimin e ligjit, përfshirë një të paraqitur nga kryeministri Sebastien Lecornu, iu dorëzuan Këshillit Kushtetues.
