Partia Demokratike e Kosovës do t’ia japë votën Marrëveshje Ndërkombëtare në Kuvendin e Kosovës. Një gjë të tillë e bëri të ditur kandidati për kryeministër nga radhët e kësaj partie, Bedri Hamza, në një konferencë për media.
Ai ka thënë se ky qëndrim i PDK-së vjen si rezultat i kandidaturës së tij për kryeministër dhe jo për shkak të takimit me kryeministrin Albin Kurti, derisa shtoi se prioritet është interesi i qytetarëve dhe jo i individëve.
“PDK do t’i votojë ato. Për neve, për mua si kandidat, prioritetet janë të qarta. Fillimisht interesi i vendit, pastaj i partisë politike dhe në fundi i neve si individë brenda partive politike. Por, mbi të gjitha e përtej të gjithave interesi i qytetarëve të vendit. Fatkeqësisht e dini se Kosova është nën masa, e nën sanksione dhe janë qindra milionë euro të bllokuara si rezultat i mos harmonizimit, mos koordinimit dhe mos bashkëpunimit me faktorë relevantë ndërkombëtar. Përtej aspektit financiar kemi të bëjmë edhe me një dëmtim të reputacionit të vendit”, ka thënë Hamza.
