Albulena Haxhiu, kandidate e Lëvizjes Vetëvendosje për deputete, njëherësh ministre e Drejtësisë theksoi se Sami Lushtaku mbrëmë personalisht ka tentuar të sulmojë eskortën e kryeministrit, Albin Kurti.
Haxhiu në një postim në Facebook shkruan se Lushtaku me veturë zyrtare, 02Z, të Komunës së Skënderajt, e ka pre rrugën e veturës së Kryeministrit me qëllim sulmin.
Dëgjova që disa gazetarë të Klan Kosovës e kanë pyetur Kryeministrin se po i përdorë veturat zyrtare, ndoshta është mirë me e pyet Saminë se prej cilës pompë të benzinës i ke komandu huliganët tu, para se të nisesh si i frustruar”, shkruan ajo.
Telegrafi ka tentuar të marr një përgjigje nga nënkryetari i Skenderajt, Sami Lushtaku, por i njëjti nuk është përgjigjur.
Ndryshe, të hënën në mbrëmje në Skenderaj gjatë aktivitetit të Lëvizjes Vetëvendosje dhe kandidatit të saj për kryeministër, Albin Kurti, disa individë kanë përdorur mjete të forta dhe piroteknike, si dhe është ndërprerë edhe energjia elektrike.
Lidhur me këtë Demokracia në Veprim ka shprehur shqetësimin lidhur me incidentin e ndodhur.
DnV, thekson se të tilla akte janë një sulm ndaj lirisë së grumbullimit dhe shprehjes së lirë, duke krijuar një atmosferë tensioni dhe pasigurie që bie në kundërshtim të plotë me parimet themelore të demokracisë.
“Ne dënojmë çdo formë dhune, provokimi apo ndërhyrje në proceset demokratike, veçanërisht gjatë një periudhe kaq të ndjeshme të fushatës zgjedhore”.
