Ministri në detyrë i Punëve të Jashtme i Kosovës, Glauk Konjufca, ka takuar ministrin e Jashtëm të Shqipërisë, Ferit Hoxha, në margjinat e Forumit të Dubrovnikut në Kroaci, ku është diskutuar për zhvillimet aktuale në vend dhe në rajon.
Hoxha ka njoftuar për takimin në rrjetin social X, duke theksuar rëndësinë e bashkëpunimit dhe koordinimit mes dy vendeve.
“Shkëmbimi i ideve, analizave dhe qasjes, si dhe koordinimi i ngushtë me qëllim fuqizimin dhe zgjerimin e bashkëpunimit, mbeten çelësi për avancimin e interesave tona të përbashkëta”, ka thënë ai.
Në deklaratën e tij, Hoxha ka folur edhe për perspektivën evropiane të dy vendeve.
“Duke vepruar së bashku dhe me vizionin e qartë të së ardhmes do të mund ta ruajmë dhe ta forcojmë më tej lidhjen tonë të pathyeshme, në funksion të një Shqipërie më të fortë, më të begatë dhe të integruar në BE, dhe Kosovës po aq të fortë, më të zhvilluar e më të sigurt. Ky është njëkohësisht një investim kyç si për forcimin e bashkëpunimit rajonal ashtu edhe për të ardhmen tonë të përbashkët në familjen euroatlantike”, ka shkruar ai.
