Tensionet në Lindjen e Mesme janë përshkallëzuar pas takimit mes kryeministrit izraelit Benjamin Netanyahu dhe presidentit amerikan Donald Trump në Shtëpinë e Bardhë. Sipas raportimeve, Irani ka sulmuar një bazë ushtarake amerikane në Jordani dhe ka goditur tre cisterna nafte në Ngushticën e Hormuzit.
Ushtria jordaneze njoftoi se ka neutralizuar dhe rrëzuar pesë raketa iraniane të lëshuara drejt territorit të saj. Më herët, Garda Revolucionare iraniane kishte deklaruar se kishte goditur një bazë amerikane në Jordani me raketa balistike.
Ndërkohë, të paktën 10 anëtarë të Forcave të Mobilizimit Popullor (PMF), një ish-aleancë paraushtarake në Irak, janë vrarë nga sulmet e përbashkëta të Shteteve të Bashkuara dhe Arabisë Saudite ndaj bazave të tyre në disa provinca të Irakut. Burime të cituara nga AFP bëjnë të ditur se numri i viktimave mund të rritet.
Përshkallëzimi i situatës ndikoi edhe në tregjet ndërkombëtare të energjisë. Çmimi i naftës Brent u rrit me 3,01 për qind, duke arritur në 87,10 dollarë për fuçi, ndërsa nafta amerikane WTI u rrit me 2,61 për qind, në 81,87 dollarë për fuçi.
Në zhvillime të tjera, mediat izraelite raportuan se Irani pritet të marrë nga Kina furnizimin e parë me rreth 400 sisteme portative kundërajrore (MANPADS), në kuadër të forcimit të mbrojtjes së tij ajrore. Megjithatë, Ministria e Jashtme e Kinës i hodhi poshtë këto raportime, duke i cilësuar si “plotësisht të pabazuara”.
Pas takimit në Uashington, kryeministri izraelit Benjamin Netanyahu e cilësoi bisedën me Donald Trump si “një nga takimet më të mira” që kanë zhvilluar ndonjëherë. Ai tha se aleanca mes Izraelit dhe Shteteve të Bashkuara është “e fortë si graniti” dhe theksoi se të dy liderët ndajnë të njëjtin qëllim: të pengojnë Iranin të pajiset me armë bërthamore.
“Ne nuk duam që regjimi i Teheranit të ketë armë bërthamore. Këtë objektiv do ta arrijmë me mjete diplomatike ose me mënyra të tjera”, deklaroi Netanyahu për Fox News.
