Dhomat e Specializuara në Hagë e kanë shpallur ish-kryetarin e Kuvendit të Kosovës, Kadri Veseli, fajtor për disa nga akuzat.
Veseli ndodhet në paraburgim në Hagë që nga nëntori i vitit dy mijë e njëzet, pas konfirmimit të aktakuzës së ngritur nga Prokuroria e Specializuar.
Gjatë luftës, Veseli ishte një nga drejtuesit e Ushtrisë Çlirimtare të Kosovës. Pas luftës ai drejtoi Shërbimin Informativ të Kosovës, ndërsa më vonë ishte kryetar i Kuvendit dhe kryetar i Partisë Demokratike të Kosovës.
Ai i kishte mohuar të gjitha akuzat dhe ishte deklaruar i pafajshëm.
Procesi gjyqësor ndaj Veselit, Hashim Thaçit, Rexhep Selimit dhe Jakup Krasniqit nisi në prill të vitit dy mijë e njëzet e tre.
Aktakuza përfshinte gjashtë pika për krime kundër njerëzimit dhe katër pika për krime lufte.
Prokuroria kishte kërkuar dënim deri në dyzet e pesë vjet burgim për secilin prej katër të akuzuarve, ndërsa mbrojtja kërkoi pafajësi.
Aktgjykimi është i shkallës së parë dhe mund të kundërshtohet në apel.
Kadri Veseli
Kadri Veseli ishte një nga figurat drejtuese të Ushtrisë Çlirimtare të Kosovës gjatë luftës dhe më pas një nga politikanët kryesorë të vendit.
Gjatë luftës, Veseli ishte pjesë e strukturave drejtuese të UÇK-së dhe ishte i angazhuar në strukturat e inteligjencës.
Pas përfundimit të luftës, ai vazhdoi angazhimin në strukturat e dala nga UÇK-ja, ndërsa më vonë iu bashkua Partisë Demokratike të Kosovës.
Veseli hyri në politikën aktive në vitin 2012, ndërsa në vitin 2013 mori drejtimin e PDK-së. Në dhjetor të vitit 2014, ai u zgjodh kryetar i Kuvendit të Kosovës, detyrë të cilën e ushtroi deri në vitin 2017.
Ai vazhdoi aktivitetin si deputet dhe drejtues i PDK-së, ndërsa në vitin 2019 ishte kandidat i kësaj partie për kryeministër të Kosovës.
Në nëntor të vitit 2020, pas konfirmimit të aktakuzës nga Dhomat e Specializuara, Veseli dha dorëheqje nga të gjitha funksionet politike dhe u transferua në Hagë.
Që nga nëntori i vitit 2020, Veseli ka qëndruar në paraburgim në Hagë gjatë zhvillimit të procesit gjyqësor ndaj tij, Hashim Thaçit, Rexhep Selimit dhe Jakup Krasniqit.
Këtu mund të ndiqni drejtpërdrejt shpalljen e aktgjykimit.
/Kosovapress/
