Në seancën që po mbahet në Hagë, Gregory Kehoe, avokati i Hashim Thaçit, po vazhdon deklaratën hyrëse, duke insistuar se Thaçi nuk ka pasur pushtet real gjatë luftës.
Ai hodhi poshtë pretendimet se Thaçi ka udhëhequr një “ndërmarrje të përbashkët kriminale”.
“Hashim Thaçi nuk kontrollonte UÇK-në, e kontrollonin komandantët e zonave”, deklaroi ai.
Kehoe po ashtu kundërshtoi pikën se Thaçi ishte munduar ta merrte Kosovën në kontroll.
“Se u komentua dje nga ZPS-ja se Qeveria e përkohshme e Kosovës, erdhi në momentin që kishte një vakum pushteti, dhe se Qeveria e përkohshme e Kosovës me Thaçin si të ashtuquajtur kryeministër po përpiqej të merrte në kontroll Kosovën. Kjo s’është aspak e vërtetë. As nga ana faktike, as nga ana ligjore”, shtoi ai.
Në seancën e mbajtur dje, Prokurori i Specializuar ka thënë se motivi i kryerjes së krimeve të pretenduara në aktakuzë nga ish-katër krerët e UÇK-së “ishte për të fituar pushtet në luftë, në Kosovë ndaj personave që perceptoheshin si kundërshtarë të UÇK-së”.
