Komandanti i misionit të KFOR-it të udhëhequr nga NATO, Gjeneral Major Özkan Ulutaş, priti në selinë e KFOR-it në Kampin Film City në Prishtinë Ambasadorin e Republikës së Turqisë në Kosovë, Sabri Tunç Angılı, në një vizitë lamtumire me rastin e përfundimit të mandatit të tij, përcjell Kosova Post.
Sipas njoftimit të KFOR-it, gjatë takimit Gjeneral Major Ulutaş e falënderoi ambasadorin Angılı për bashkëpunimin dhe mbështetjen e ngushtë gjatë gjithë mandatit të tij diplomatik në Kosovë. Ai i uroi gjithashtu suksese në detyrat dhe angazhimet e tij të ardhshme.
KFOR-i rikujtoi se vazhdon të zbatojë mandatin e tij në përputhje me Rezolutën 1244 të Këshillit të Sigurimit të Kombeve të Bashkuara të vitit 1999, duke kontribuar në mënyrë të paanshme për një mjedis të sigurt dhe të qetë, si dhe për garantimin e lirisë së lëvizjes për të gjitha komunitetet në Kosovë.
Në njoftim theksohet gjithashtu se KFOR-i vazhdon bashkëpunimin dhe koordinimin e ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në përputhje me përgjegjësitë e tij në fushën e sigurisë.
