Qeveria në detyrë ka miratuar nismën për lidhjen e marrëveshjes ndërkombëtare me Bashkimin Evropian për përfshirjen e Kosovës në zonën “EU Roam Like at Home”, e cila synon heqjen e tarifave shtesë të roaming-ut ndërmjet Kosovës dhe vendeve të BE-së.
Ministri në detyrë i Digjitalizimit dhe Administratës Publike, Lulëzon Jagxhiu, tha në konferencën për media pas mbledhjes së Qeverisë se ky vendim hap rrugë për negociatat dhe arritjen e marrëveshjes me Bashkimin Evropian.
“Vendimi i sotëm hap rrugë për zhvillimin e negociatave dhe arritjen e marrëveshjes me Bashkimin Evropian”, deklaroi Jagxhiu.
Sipas tij, marrëveshja do t’u mundësojë qytetarëve të Kosovës që udhëtojnë në vendet e BE-së të përdorin shërbimet e telefonisë mobile pa kosto shtesë roaming-u.
“Kjo marrëveshje do t’u mundësojë qytetarëve të Kosovës që udhëtojnë në vendet e BE-së për punë, studime, turizëm apo vizita familjare, të komunikojnë pa kosto shtesë roaming-u. Njësoj si qytetarët e Bashkimit Evropian”, tha ministri në detyrë.
Ai shtoi se nga kjo marrëveshje pritet të përfitojnë edhe bizneset dhe diaspora kosovare.
“Bizneset kosovare do të kenë kushte më konkurruese për zhvillimin e aktiviteteve të tyre në tregun evropian, duke ulur kështu kostot operative dhe duke lehtësuar bashkëpunimin ndërkombëtar”, u shpreh Jagxhiu.
Sipas tij, Kosova ka nisur përgatitjet për përmbushjen e kërkesave që lidhen me zbatimin e rregullativës së BE-së për roaming-un. Ai bëri të ditur se projektligji i ri për komunikimet elektronike, i cili transpozon Kodin Evropian të Komunikimeve Elektronike, së shpejti do t’i nënshtrohet konsultimit publik.
Në mbledhjen e sotme, Qeveria në detyrë ka miratuar edhe kornizën për ndërtimin e kapaciteteve digjitale në administratën publike.
Jagxhiu tha se kjo kornizë synon zhvillimin e aftësive digjitale në institucionet publike dhe një qasje të përbashkët për përdorimin e teknologjisë.
“Korniza e miratuar sot e adreson pikërisht këtë nevojë. Kjo kornizë përcakton një model të unifikuar për zhvillimin e aftësive digjitale thelbësore të nevojshme për qeverisje efektive, ofrim cilësor të shërbimeve dhe inovacion”, deklaroi ministri në detyrë.
Ai theksoi se transformimi digjital duhet të shihet si ndryshim institucional dhe profesional, e jo vetëm si investim në teknologji.
“Korniza synon që transformimi digjital të kuptohet si ndryshim institucional dhe profesional, e jo vetëm si investim në teknologji e sisteme”, tha tutje Jagxhiu.
