Në 15-vjetorin e pavarësisë së Kosovës, kryeministri Albin Kurti priti ekipin e Shoqatës së Kosovës për Kërkim-Shpëtim (SHKKSH) që operoi për pesë ditë në ndihmë të autoriteteve turke në operacione të kërkim-shpëtimit pas tërmetit shkatërrues të 6 shkurtit në Türkiye, raporton Anadolu.
Siç njofton Zyra e Kryeministrit, ekipi i SHKKSH-së informoi kryeministrin Kurti për veprimet dhe përvojat individuale dhe ekipore të ekipit gjatë zhvillimit të operacionit të kërkim-shpëtimit në Hatay, një nga zonat më të goditura dhe më të dëmtuara nga tërmeti.
“Ekipi kosovar i kërkim-shpëtimit gjatë ditëve sa operoi në zonën Hatay shpëtoi jetën e dy vajzave, njëra 3 vjeçare dhe tjetra 26 vjeçare. Autoritetet turke dhe ekipet tjera ndërkombëtare kanë vlerësuar lart profesionalizimin dhe vetëmohimin e treguar të ekipit të SHKKSH gjatë kryerjes së operacioneve të kërkim-shpëtimit”, njofton komunikata.
Kryeministri Kurti përgëzoi ekipin për punën dhe suksesin e treguar gjatë operacionit në Türkiye dhe i inkurajoi ata të vazhdojnë të kultivojnë frymën e vullnetarizmit, jo vetëm në organizatë por edhe në shoqëri.
Kryetari i Shoqatës, Mahir Hasani, falënderoi kryeministrin Kurti që pavarësisht angazhimeve për festën e pavarësisë, gjeti kohë të mirëpres dhe takojë ekipin e SHKSHK.
Në këtë takim, kryeministri Kurti u shoqërua nga kolonel Ejup Maqedonci, oficer i Forcës së Sigurisë së Kosovës (FSK) me përvojë të gjatë në fushën e kërkim-shpëtimit.
Shoqata e Kosovës për Kërkim-Shpëtim është një organizatë vullnetare që njihet për aktivitete të ndryshme të kërkimit dhe shpëtimit në mbështetje të institucioneve të Kosovës. Gjatë qëndrimin në Türkiye, ata kanë bashkëpunuar ngushtë me kontingjentin e FSK-së atje, i cili po vazhdon angazhimin e tyre në ndihmë të institucioneve turke.
