Kryeministri i Kosovës, Albin Kurti ka shprehur ngushëllime për vdekjen e fotoreporterit Alban Bujari, përcjell KosovaPost.
Kurti tha se Bujari me punën e tij, la pas trashëgimi historike e kombëtare.
“Syri i tij na ka përcjellë për afër tri dekada, e unë fytyrën e tij e kam parë në pothuajse çdo aksion politik si opozitar e aktivitet publik tash si kryeministër. Jemi takuar shpesh, por jo aq sa duhej për kohën e gjatë që njiheshim. Do të na mungojë gjithmonë; mungesa e tij do të vërehet përherë. Por, ai do të jetojë përmes veprave të tij, e nga to do ta mbajë të gjallë edhe kujtimin për viktimat e luftës së fundit, masakrat e shtypjen sistematike të viteve të ’90-ta. Fotografitë e Albanit janë e do të jenë gjithmonë kujtesa jonë për dhimbjet e popullit tonë dhe përkujtimi i çmimit për lirinë që e gëzojmë sot”, ka shkruar Kurti në Facebook.
