Kryeministri i Republikës së Kosovë, Albin Kurti mirëpriti sot në takim ministrin e Punëve të Jashtme të Suedisë, Tobias Billström.
Siç njofton zyra për informim e kryministrit, Kurti falenderoi diplomatin suedez për përkrahje të vazhdueshme të këtij shteti e veçmas gjatë presidencës suedeze të Këshillt të BE-së, kur edhe u mor vendimi përfundimtar për liberalizim të vizave për Kosovën.
“Kurti shprehu falënderimin e tij për mbështetjen e hershme të Suedisë, edhe para shpalljes së pavarësisë së Kosovës, dhe të vazhdueshme përgjatë gjithë fazave të shtetndërtimit dhe konsolidimit ndërkombëtar. Përfshirë këtu, mbështetjen në procesin e liberalizimit të vizave, i cili përfundimisht mori epilogun pozitiv dje, pikërisht gjatë presidencës suedeze të Këshillit të BE-së, me rastin nënshkrimit të vendimit të Parlamentit Evropian.”, thuhet në njoftim.
Kurti deklaroi se Suedia është në mesin e top 5 donatorëve më të mëdhenj në Kosovë, duke dhënë kontribut të çmueshëm në fuqizimin e kapaciteteve të administratës publike, në përgatitjen dhe hartimin politikave për barazi dhe mbrojtjen e mjedisit, dhe promovimin e demokracisë dhe të drejtave të njeriut.
“Në takim u diskutua për marrëdhëniet dypalëshe shumë të mira dhe miqësore ndërmjet Kosovës dhe Suedisë. Kryeministri Kurti e njoftoi ministrin Billström për progresin e vendit dhe arritjet e qeverisë. Ai tha se Kosova është partnere dhe mike e qëndrueshme e Suedisë, me të cilën ndanë vlera të përbashkëta demokratike dhe orientim të përbashkët euro-atlantik. Të dyja palët shprehën interesimin për përafrimin dhe thellimin e mëtejshëm të marrëdhënieve bilaterale. Me këtë rast, u theksua rëndësia e Odës Nordike Ekonomike e cila pritet të hapet së shpejti dhe roli që ajo do ta ketë në rritjen e bashkëpunimit ekonomik dhe shkëmbimeve tregtare.”, thuhet tutje në njoftim.
Kjo ishte hera e dytë që ministri Billström viziton Kosovën në kapacitete të ndryshme. Herën e parë ishte në Kosovë para një dekade./
