Ministrja në detyrë e Industrisë, Ndërmarrësisë, Tregtisë dhe Inovacionit, Mimoza Kusari-Lila, ka bërë të ditur se ka marrë pjesë në një tryezë diskutimi për tërheqjen e investimeve të huaja në Kosovë, e organizuar nga `KUSA Economic Growth and Integration with the West Team`, në bashkëpunim me Ambasadën e Shteteve të Bashkuara në Kosovë.
Kusari-Lila ka thënë se ishte kënaqësi e veçantë rikthimi në diskutim me KUSA (Kosova United States Alumni), organizatën që bashkon përfituesit e programeve të Departamentit Amerikan të Shtetit, të cilën ajo, së bashku me bursistë të tjerë, e ka themeluar 18 vjet më parë.
Sipas saj, gjatë tryezës është bashkëbiseduar edhe me të Ngarkuarën me Punë të SHBA-së në Kosovë, Anu Prattipati, si dhe me anëtarët e KUSA-s, për mundësitë konkrete të forcimit të klimës së investimeve dhe zhvillimit ekonomik të vendit.
Ajo ka theksuar se Kosova ka popullsi të re dhe dinamike, diasporë të fuqishme, orientim të qartë euro-atlantik dhe potencial në sektorë si prodhimi, energjia, bujqësia, turizmi, inovacioni dhe shërbimet.
Ministrja ka shtuar se fokusi mbetet promovimi i Kosovës si destinacion atraktiv për investime dhe krijimi i kushteve për realizimin e projekteve me procedura të qarta, transparencë dhe mbështetje institucionale.
Në fund, Kusari-Lila ka falënderuar anëtarët e KUSA-s dhe Ambasadën Amerikane për kontributin me ide, përvoja dhe rekomandime konkrete për zhvillimin ekonomik të vendit.
