Gjykata Kushtetuese ka shpallur aktgjykim me të cilin ka konstatuar se aktvendimi i Gjykatës Supreme i marrë më 3 maj 2023 shkel të drejtat kushtetuese të parashtruesve të kërkesave Dino’s Las Vegas sh.p.k. dhe Matrix sh.p.k., për rastet KI184/23 dhe KI185/23.
Me vendim unanim, Gjykata Kushtetuese konstatoi se ky aktvendim ka shkelur paragrafin 1 të nenit 31 të Kushtetutës, që garanton të drejtën për gjykim të drejtë dhe të paanshëm, si dhe nenin 6 të Konventës Evropiane për të Drejtat e Njeriut. Për rrjedhojë, aktvendimi i Gjykatës Supreme është shpallur i pavlefshëm dhe rasti është kthyer për rishqyrtim në Supreme.
Kontesti lidhet me një kërkesëpadi të iniciuar nga Play 4 Win sh.p.k., me seli në Pejë, kundër Dino’s Las Vegas sh.p.k., Matrix sh.p.k. dhe Invest Kosova sh.p.k., duke kërkuar kompensim dëmi për përdorim të kundërligjshëm të një marke tregtare të regjistruar nga Play 4 Win.
Gjykata Themelore në Prishtinë më 29 prill 2021 kishte vendosur në favor të Play 4 Win sh.p.k., duke konstatuar se tre të paditurit kishin përdorur kundërligjshëm markën tregtare të regjistruar nga paditësi. Ky vendim u konfirmua nga Gjykata e Apelit më 7 tetor 2021.
Të pakënaqur me këtë, Dino’s Las Vegas sh.p.k. dhe Matrix sh.p.k. parashtruan revizion në Gjykatën Supreme, e cila e hodhi poshtë atë si të palejuar, me arsyetimin se vlera e objektit të kontestit nuk kalonte 10 mijë euro.
Gjykata Kushtetuese vlerësoi se Gjykata Supreme nuk kishte shqyrtuar si duhet vlerën e objektit të kontestit dhe kishte aplikuar një formalizëm të tepruar, duke vendosur për refuzimin e revizionit mbi bazën e taksës gjyqësore prej 25 eurosh, pa marrë parasysh kriteret objektive të përcaktimit të vlerës monetare të çështjes.
Andaj, parashtruesit e kërkesave në Gjykatën Kushtetuese kontestuan kushtetutshmërinë e vendimit të Supremes.
Në vendimin e saj, Gjykata Kushtetuese theksoi se një qasje e tillë e Gjykatës Supreme kishte cenuar të drejtën e parashtruesve për qasje në gjykatë, duke tejkaluar kufijtë e vlerësimit të saj ligjor dhe duke vendosur një pengesë joproporcionale për shqyrtimin e rastit në thelb.
Gjykata Kushtetuese thekson se duke marrë parasysh që në rastin e parashtruesve të kërkesave kanë vendosur dy instanca gjyqësore- ajo Themelore dhe e Apelit, të cilat kishin juridiksion të plotë në këtë rast dhe se roli i Gjykatës Supreme është rishikimi i zbatimit të ligjit në fuqi nga gjykatat e shkallës më të ulët, arrihet në përfundimin se vendimmarrja e Gjykatës Supreme në rastin konkret përbënte pengesë joproporcionale e cila e cenon vetë thelbin e të drejtës së parashtruesve të kërkesave, të garantuar me Kushtetutë dhe se e njëjta ka tejkaluar lirinë e vlerësimit.
Sipas kësaj Gjykate, konstatimi i shkeljes së paragrafit 1 të nenit 31 të Kushtetutës, në lidhje me paragrafin 1 të nenit 6 të KEDNj-së, vlen vetëm për rrethanat specifike të rastit konkret dhe ndërlidhet vetëm me të drejtën e qasjes në Gjykatën Supreme, por në asnjë mënyrë nuk e paragjykon rezultatin e meritave të rastit.
Për rrjedhojë, Gjykata Kushtetuese e shpalli të pavlefshëm aktvendimin e Gjykatës Supreme dhe e ktheu çështjen për rishqyrtim, duke kërkuar një rivlerësim në përputhje me të drejtat kushtetuese të garantuara./Betimi për Drejtësi
