Ministri i Mbrojtjes i Kosovës, Ejup Maqedonci, ka marrë pjesë si folës në edicionin e 12-të të Shkollës Diplomatike për Diplomatë të Rinj, të organizuar nga Akademia Diplomatike e Republikës së Kosovës, ku ka diskutuar me diplomatë të rinj nga vende të ndryshme të Evropës, Azisë, Afrikës dhe Amerikave.
Gjatë bashkëbisedimit, Maqedonci ka trajtuar ndërlidhjen ndërmjet diplomacisë dhe mbrojtjes, sfidat bashkëkohore të sigurisë, rëndësinë e bashkëpunimit ndërkombëtar dhe zhvillimin e kapaciteteve mbrojtëse të Republikës së Kosovës.
Sipas tij, siguria nuk ndërtohet vetëm përmes kapaciteteve ushtarake, por edhe përmes diplomacisë, institucioneve të qëndrueshme dhe partneriteteve ndërkombëtare.
Ministri ka theksuar gjithashtu rëndësinë e bashkëpunimit me shtetet anëtare të NATO-s, zhvillimit të industrisë së mbrojtjes dhe avancimit të Programit Gjithëpërfshirës të Mbrojtjes, si pjesë e angazhimeve për forcimin e sigurisë së vendit.
Maqedonci ka vënë në pah edhe rolin e diplomatëve të rinj në ndërtimin e marrëdhënieve ndërmjet shteteve, forcimin e mirëkuptimit dhe promovimin e paqes e të stabilitetit.
Ai ka theksuar se siguria është përgjegjësi e përbashkët dhe bëhet më e qëndrueshme kur diplomacia, institucionet e mbrojtjes dhe partneritetet ndërkombëtare veprojnë në mënyrë të koordinuar.
