Pas rasteve të fundit të vrasjeve ndaj grave dhe takimit me ministrin e Punëve të Brendshme, kryesuesit e këshillave, u.d Kryeprokurorin dhe Drejtorin e Policisë së Kosovës dhe pas mbledhjes së grupit ndërministror, ministrja e Drejtësisë, njëherësh Koordinatore Kombëtare për Mbrojtje nga Dhuna në Familje, Albulena Haxhiu, ka mbajtur konferencë të jashtëzakonshme për media.
Ministrja Haxhiu, duke dënuar rastet e vrasjeve të fundit të grave, tha se institucionet duhet të veprojnë me urgjencë. “Me bindje e them që ky fenomen është armiku ynë i brendshëm me rrezik të madh. Nga viti 1999 e deri më sot janë shënuar 99 gra të vrara nga burrat. Mbi 200 raportime për dhunë në baza ditore në polici. Kjo është një gjë shqetësuese. Po ashtu shqetësues mbetet edhe gjuha e ashpër në rrejte sociale. Me urgjencë duhet të veprojnë institucionet e drejtësisë, duke mos neglizhuar asnjë raste të dhunës në familje”, ka theksuar Haxhiu.
Tutje ministrja Haxhiu ka thënë se për gjithë ata individ që forcën e shprehin në trupa të grave “e vetmja strehë për ta është burgu”.
“Le të këtë dënime maksimale meritore. U bëjë thirrje që secili prokuror, gjyqtar, polic e zyrtar tjetër që të kryej detyrën e tyre me përgjegjësinë më të lartë. Do të angazhohem në luftë kundër këtyre fenomeneve dhe na duhet forcë nga të gjithë që të zhdukim fenomenin e vrasjeve”, u shpreh tutje ministrja Haxhiu.
