Ministri i Financave, Hekuran Murati ka reguar pasi kryetari i Prishtinës, Përparim Rama, në një konferencë për media të enjten akuzoi Qeverinë se nuk po e mbështet për projektet madhore të kryeqytetit.
Ndërsa i reagon të parit të kryeqytetit, ministri Murati ka publikuar një grafikon përmes së cilit pretendon se në tri vjetët e fundit ka pasur rritje të mbështetjes financiare të Qeverisë karshi Komunës së Prishtinës, por ai akuzoi komunën e udhëhequr nga Përparim Rama se e mbyll vitin me suficit (buxhet të pashpenzuar).
“Grafikoni më poshtë paraqet mbështetjen buxhetore që Qeveria i ka dhënë Komunës së Prishtinës nëpër vite (me ngjyrë të kaltër). Siç edhe mund të shihet, ka rritje të theksuar të mbështetjes me buxhet nga Qeveria në tri vitet e fundit. Por ç’e do këtë rritje kur Komuna e Prishtinës në vazhdimësi e mbyll vitin me suficit, sepse nuk arrin të implementojë buxhetin që vet e harton. Në vitin që sapo lamë pas, suficiti (buxheti i pashpenzuar) i Komunës së Prishtinës rezulton mbi 33 milionë euro. Po kaq, 33 milionë euro, është buxheti i Komunës së Podujevës. Pra imagjinoni se sa punë arrin të bëjë Komuna e Podujevës me këtë buxhet, kaq pra i tepron Komunës së Prishtinës e qytetarëve të Prishtinës u mohohen ato projekte për shkak të mos-realizimit”, ka shkruar ai në Facebook.
Ministri Mutrati, ndërkohë ka edhe një porosi për të parin e kryeqytetit Përparim Rama.
“Andaj, kryetari i Komunës Rama, në vend se të kërkojë fajtorin gjetiu, bën mirë që të përqëndrohet në kryerjen e punëve për të cilat u ka premtuar qytetarëve”, ka shkruar Murati në Facebook.
