Zgjidhet problemi, së shpejti fillon ndërtimi i Qendrës Kryesore të Mjekësisë Familjare në Ferizaj në vlerë të 2 milionë e 250 mijë eurove, përcjell Kosova Post.
Ferizaj paraqet qendër urbane me shtim të vazhdueshëm të popullsisë, rrjedhimisht edhe nevojave për të mbuluar kërkesat për shërbime shëndetësore, çka prodhoi projektin për ndërtimin e objektit të ri të QKMF-së, që mori dritën jeshile të mbështetjes nga Ministria e Shëndetësisë e ku sot përfundimisht, ministri Arben Vitia, së bashku me Kryetarin e Komunës së Ferizajit, Agim Aliu, shkëmbyen marrëveshjet përkatëse, për t’i hapur rrugë procedurave për ndërtimin e objektit të ri të QKMF-së në kryqëzimin e rrugëve “Driton Islami” e “Bedri Asllani”.
Ministri Vitia tha se ndërtimi i QKMF-së me një infrastrukture moderne, është jashtëzakonisht i rëndësishëm për qytetarët të Ferizajt.
Ministria e Shëndetësisë do të ndajë për këtë projekt 2 milionë e 25 mijë euro (90%), ndërsa Komuna e Ferizajt do të participojë me 225 mijë euro apo 10% të vlerës totale, si dhe merr përsipër koston shtesë në rast të tejkalimit të buxhetit të planifikuar.
