Deputetja socialiste, Marjana Koçeku, e njohur si Neomalsorja, ka reaguar lidhur me dhunën policore të ushtruar ndaj protestuesve ditën e sotme para Parlamentit.
Koçeku shkruan se e ka ndjekur me shqetësim këtë situatë dhe akuzon qeverinë se e vetmja gjë që mund të ofrojë është dhuna sepse nuk ka argumente bindëse. Deputetja deklaron se nëse shohim historinë asnjë pushtet nuk e ka zgjatur qëndrimin e tij në momentin që dhunon qytetarët.
“Kam ndjekë me shqetësim sot dhunën policore të ushtrueme mbi protestuesit. Më vjen keq që i vetmi komunikim dhe mesazh politik që ky pushtet mundet me u ofru protestuesve asht dhuna.
Kur argumentet i mbarojnë nji shteti, mbesin vetëm shkopi i gomës, prangat dhe çizmja e policit. Por asnji pushtet nuk e ka zgjatë jetën e vet tu i goditë qytetarët që kërkojnë me u dëgjue. Merrni datat ma kyçe të historisë dhe do shihni se këtë e kena dëshmue çdo herë.
Nji shtet që zgjedh me iu përgjigjë pakënaqësisë qytetare me dhunë, nuk po demonstron forcë; po demonstron pafuqinë e vet për me bindë”, shkruan ajo.
