Më shumë se 70 për qind e shkollave në Rripin e Gazës janë goditur drejtpërdrejt nga sulmet izraelite që nga tetori i vitit 2023, tha sot agjencia e OKB-së për refugjatët palestinezë (UNRWA), transmeton Anadolu.
“Rreth 88 për qind të shkollave në Gaza u duhet rindërtim ose rehabilitim i madh”, tha agjencia e OKB-së në një deklaratë.
“Kjo përfshin 162 shkolla të UNRWA-s që dikur u shërbenin qindra mijëra djemve dhe vajzave”, thuhet në deklaratë.
Agjencia e refugjatëve theksoi se lufta izraelite në Gaza ka zhvendosur, traumatizuar dhe privuar fëmijët palestinezë nga arsimi.
“Arsimi në Gaza është një viktimë e luftës”, shtoi ajo.
Ushtria izraelite rifilloi sulmet vdekjeprurëse në Gaza më 18 mars, duke prishur një marrëveshje armëpushimi dhe shkëmbimi të të burgosurve që hyri në fuqi në janar.
Gati 51.000 palestinezë, shumica prej tyre gra dhe fëmijë, janë vrarë në Gaza nga sulmet brutale izraelite që nga tetori 2023.
Gjykata Ndërkombëtare Penale lëshoi urdhra arresti nëntorin e kaluar për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij në enklavën palestineze.
