Presidentja e Kosovës, Vjosa Osmani, priti ambasadorin e ri të Japonisë, Keisuke Iwama, nga i cili pranoi letrat kredenciale. Gjatë takimit, Osmani vlerësoi marrëdhëniet e ngushta mes dy vendeve dhe shprehu mirënjohjen për mbështetjen japoneze, transmeton KosovaPost.
Sipas një njoftimi nga Presidenca, pasi që i ka uruar ambasadorit të ri japonez mirëseardhje dhe suksese në mandatin e tij, Osmani ia përcolli gjithashtu urimet e përzemërta me rastin e ditëlindjes së Perandorit Naruhito të Japonisë, e cila sot shënohet nga Ambasada e Japonisë në pritjen e organizuar për nder të kësaj dite.
“Gjatë takimit, presidentja Osmani e vlerësoi Japoninë si një partner strategjik afatgjatë dhe shprehu mirënjohjen për mbështetjen e vazhdueshme të Japonisë ndaj Kosovës, veçanërisht përmes Agjencisë Japoneze për Bashkëpunim Ndërkombëtar (JICA). Ajo theksoi kontributin e çmuar të Japonisë në zhvillimin e Kosovës në fusha të ndryshme, përfshirë mjedisin, çështjet politike e diplomatike, mediat, pajisjet shëndetësore, sigurinë ushqimore, teknologjinë informative etj.,” thuhet në njoftim.
Gjithashtu, Osmani theksoi rëndësinë e zgjerimit të mëtejshëm të bashkëpunimit në tregti, investime, kulturë, shëndetësi dhe arsim, duke përmendur edhe projektet e bursave arsimore japoneze dhe programet e shkëmbimit kulturor për të rinjtë e Kosovës.
Ndër të tjera, në këtë takim, presidentja Osmani diskutoi me ambasadorin Iwama për vizitën e saj të planifikuar dhe të dakorduar në Japoni në qershor të këtij viti.
