Derisa dy partitë, Partia Demokratike e Kosovës dhe Lidhja Demokratike e Kosovës, nuk duan që të kenë takim me Ushtruesen e Detyrës së Presidentes së Kosovës, Albulena Haxhiu, ku në fokus është zgjidhja e ngërçit politik, kur është fjala për kërkesa për propozim në Komisionin Qendror të Zgjedhjeve (KQZ), dy partitë e konsiderojnë Haxhiun si u.d. të Presidentes.
Partia Demokratike e Kosovës, në kërkesën e datës 14 gusht, kërkon nga Haxhiu që, në bazë të kompetencave që i ka, ajo dhe Partia Demokratike e Kosovës, e cila e ka grupin e dytë më të madh parlamentar, t’ia përcjellë propozimet për dy anëtarët që do ta përfaqësojnë në Komisionin Qendror të Zgjedhjeve.Edhe Lidhja Demokratike e Kosovës, në letrën e saj, shkruan: Për: Znj. Albulena Haxhiu, Ushtruese e Detyrës së Presidentes së Republikës së Kosovës dhe për Nominimi i anëtarit të Komisionit Qendror të Zgjedhjeve.
“Shkëlqesisë suaj, znj. Haxhiu, në përputhje me nenin 139.4 të Kushtetutës së Republikës së Kosovës dhe me nenin 61 të Ligjit Nr. 08/L-228 për Zgjedhjet e Përgjithshme në Republikën e Kosovës, si dhe, duke u bazuar në rezultatet e zgjedhjeve për Kuvendin e Republikës së Kosovës të datës 7 qershor 2026, të certifikuara sipas Vendimit të Komisionit Qendror të Zgjedhjeve, të datës 08.07.2026, Lidhja Demokratike e Kosovës, përmes kësaj shkrese, ua përcjell emrin e të nominuarit për anëtar të Komisionit Qendror të Zgjedhjeve”, thuhet në kërkesën e LDK-së.
Kryetari i Lidhjes Demokratike të Kosovës, Lumir Abdixhiku,sot ka konfirmuar se nuk do t’i përgjigjet ftesës së ushtrueses së detyrës së presidentes, Albulena Haxhiu, për takim me liderët e partive politike.
Abdixhiku ka thënë se LDK-ja është e gatshme të zhvillojë takime me kryetarët e partive politike, por sipas tij, në rrethanat aktuale, takimi mund të zhvillohet vetëm me kryetarin e Lëvizjes Vetëvendosje, Albin Kurtin. “Ne takimet i zhvillojmë me kryetarët e partive. Dhe në këtë rast, takimin e vetëm që mund ta bëjmë është me zotin Kurti, kryetarin e Lëvizjes Vetëvendosje. Në pikëpamjen tonë, zonja Haxhiu është deputete e Kuvendit të Kosovës, njëra nga 120 deputetët e Kuvendit të Kosovës. Dhe në këtë drejtim, ne mund të flasim vetëm me ata që janë përgjegjës për këtë punë”, ka thënë Abdixhiku në një prononcim për media vendore./rtk
