Tensionet në administratën Trump po thellohen edhe më shumë për shkak të diskutimeve për një ndërhyrje të mundshme ushtarake të SHBA-së ndaj Iranit.
Mediat amerikane, duke cituar burime nga brenda Shtëpisë së Bardhë, raportojnë për përçarje të dukshme mes presidentit Trump dhe drejtoreshës së Inteligjencës Kombëtare, Tulsi Gabbard, e cila është lënë jashtë diskutimeve të nivelit të lartë mbi krizën.
Mungesa e saj në takimin e zhvilluar më 8 qershor në Camp David, ku u diskutuan tensionet mes Izraelit dhe Iranit, është parë si sinjal i qartë i krizës që ka nisur në Uashington.
Zyrtarisht, mungesa u justifikua me angazhimin e saj në një trajnim të Gardës Kombëtare, por NBC News raporton se arsyeja e vërtetë lidhet me qëndrimet e saj kritike ndaj përshkallëzimit ushtarak.
Presidenti Trump ka shprehur hapur mospajtimin me Gabbard, sidomos pas dëshmisë së saj në Kongres në mars, ku ajo tha se komuniteti i inteligjencës nuk beson se Irani po zhvillon armë bërthamore, deklaratë që bie ndesh me retorikën e presidentit.
Videoja e publikuar nga Gabbard më 10 qershor nga Hiroshima, ku paralajmëron për rrezikun e një konflikti bërthamor, është parë si një tjetër pikë tensioni me Shtëpinë e Bardhë.
Zyrtarët e administratës pohuan se videoja është interpretuar si një kritikë e drejtpërdrejtë ndaj qasjes aktuale të presidentit ndaj Iranit dhe Izraelit.
Përçarja Trump-Gabbard nxjerr në pah edhe një ndasi më të gjerë brenda lëvizjes MAGA, ku një pjesë e republikanëve tradicionalë dhe neokonservatorëve mbështesin një linjë të ashpër ndaj Teheranit, ndërsa Gabbard përfaqëson një rrymë më skeptike ndaj ndërhyrjeve ushtarake dhe promovon diplomacinë.
Pavarësisht tensioneve, zëvendëspresidenti JD Vance dhe disa zyrtarë të tjerë vazhdojnë ta mbështesin Gabbard, duke e cilësuar si një pjesë të rëndësishme të ekipit të sigurisë kombëtare.
Megjithatë, përjashtimi i saj nga diskutimet më të rëndësishme strategjike e vendos atë në një pozitë politike të brishtë./EURONEWS
