Zëdhënësi i Qeverisë së Kosovës, Fatlum Jashari, ka reaguar ndaj raportimeve që e paraqesin një tender për blerjen e veturave si shpenzim për “luksin institucional”, duke e lidhur atë me Kryeministrin, raporton Kosova Post.
Jashari e ka cilësuar këtë si “shembull të keqinformimit të qëllimshëm”, duke theksuar se tenderi nuk parasheh asnjë veturë për Kryeministrin apo Zyrën e Kryeministrit.
“Lëre që s’bëhet fjalë për kryeministrin, por as për luks”, ka shkruar Jashari, duke paraqitur edhe ndarjen e veturave sipas institucioneve përfituese.
Sipas tij, nga gjithsej 104 vetura, 21 janë të destinuara për MPB-në, Agjencinë e Regjistrimit Civil dhe Ministrinë e Digjitalizimit dhe Administratës Publike, 17 për Ministrinë e Industrisë, Ndërmarrësisë dhe Tregtisë, ndërsa 15 për Shërbimin Spitalor Klinik Universitar të Kosovës.
Po ashtu, 13 vetura janë parashikuar për agjenci të ndryshme, 11 për pesë komuna, 10 për inspektorate të ndryshme dhe 4 për KPK-në dhe KGJK-në, ndërsa pjesa e mbetur për institucione të tjera.
Vlera e tenderit, sipas Jasharit, është 2.4 milionë euro, për një sasi prej 104 veturash, me një çmim mesatar prej rreth 23 mijë euro për veturë. Autoritet kontraktues është Agjencia Qendrore e Prokurimit (AQP).
Reagimi i zëdhënësit të Qeverisë vjen pas publikimeve ku, sipas tij, një proces prokurimi i përbashkët për institucione të ndryshme është paraqitur si blerje veturash për Kryeministrin dhe si pjesë e një “luksi institucional”.
Jashari ka vënë theksin te dallimi mes të dhënave të tenderit dhe mënyrës së paraqitjes së tyre në publik, duke pretenduar se përdorimi i fotografisë së Kryeministrit dhe formulimi i titullit krijojnë një perceptim të pasaktë mbi destinimin e mjeteve.
