Qeveria gjermane ka akuzuar miliarderin e teknologjisë, Elon Musk, për përpjekje për të ndërhyrë në fushatën zgjedhore të vendit, pasi ai ka mbështetur disa herë, në mënyrë të diskutueshme, partinë ekstremiste të djathtë, Alternative për Gjermaninë (AfD), pak javë përpara zgjedhjeve federale.
“Është e vërtetë që Elon Musk po përpiqet të ndikojë në zgjedhjet federale me deklaratat e tij”, tha zëdhënësja e qeverisë, Christiane Hoffmann.
Ajo theksoi se, megjithëse Musk është “i lirë të shprehi mendimin e tij”, është e rëndësishme të përmendet se ai po mbështet një parti që po monitorohet nga Zyra për Mbrojtjen e Kushtetutës për shkak të dyshimeve për ekstremizëm të djathtë dhe që në disa pjesë është njohur si parti ekstreme e djathtë.
Musk shkaktoi një reagim të madh në Gjermani javën e kaluar, kur mbështeti hapur AfD-në në platformën e tij sociale, X.
Pavarësisht reagimeve të shumta negative, ai qëndroi pas komenteve të tij dhe publikoi një artikull në gazetën gjermane Welt am Sonntag të shtunën, ku shkruante: “Paraqitja e AfD-së si parti ekstreme të djathtë është qartazi e pasaktë, duke pasur parasysh që liderja e partisë, Alice Weidel, ka një partner të së njëjtës gjini nga Sri Lanka! A ju duket kjo si Hitler?”
Kur artikulli u bë publik, redaktorja e mendimit në Welt am Sonntag, Eva Marie Kogel, dha dorëheqjen në shenjë proteste.
Lideri i Partisë Socialdemokrate të Gjermanisë (SPD), Lars Klingbeil, e krahasoi Elon Musk me presidentin rus Vladimir Putin, duke e quajtur vendimin e tij për të ndërhyrë në politikën gjermane disa javë para zgjedhjeve një shembull të qartë të “përzierjes”.
Në një intervistë për grupin mediatik Funke, Klingbeil tha: “Të dy, Musk dhe Putin, duan të ndikojnë në zgjedhjet tona dhe qëllimisht po mbështesin AfD-në, armiqtë e demokracisë. Ata duan që Gjermania të dobësohet dhe të zhytet në kaos”.
Po ashtu, bashkëkryetarja e SPD-së, Saskia Esken, e dënoi Musk si një ndërhyrës dhe e krahasoi me ndërhyrjen ruse në zgjedhje.
Akuzat ndaj Musk për ndërhyrje në politikën gjermane ka nxitur debat të gjerë mbi ndikimin e miliarderëve të teknologjisë dhe platformave sociale në proceset zgjedhore dhe stabilitetin demokratik të shteteve.
