Claudio Ranieri është duke e përmbyllur kapitullin e tij të fundit si trajner i Romës, me një sezon të jashtëzakonshëm që ka ringjallur shpresat e klubit për një vend në Champions League.
Tekniku shtatëdhjetë e tre vjeçar, i cili kishte shpallur tërheqjen nga futbolli në fund të sezonit të kaluar pasi kishte shpëtuar Cagliari nga rënia, nuk i kishte rezistuar thirrjes së klubit të zemrës, ku dikur kishte nisur karrierën si futbollist. Ranieri mori drejtimin e Romës në nëntor, kur skuadra ndodhej në mesin e poshtëm të tabelës dhe dymbëdhjetë pikë larg zonës Champions. Mandati i tij i tretë në stolin verdhekuq nuk kishte nisur mbarë, me tri humbje në katër ndeshje, por më pas, skuadra kishte nisur një seri të pabesueshme: tetëmbëdhjetë ndeshje pa humbje në Serie A që nga dhjetori, duke e ngjitur Romën në vendin e gjashtë, vetëm dy pikë larg katërshes së parë.
“Kam dhënë gjithçka. Futbolli është jeta ime, por vjen një moment kur duhet të thuash ‘mjaft’”, ka deklaruar Ranieri të hënën, pas marrjes së çmimit ‘Inside the Sport’ për kontributin e tij në futboll. “Këtë e thashë me zemër edhe te Cagliari dhe të gjithë më besuan, përfshirë bashkëshorten time… derisa më telefonoi Roma”.
Me katër ndeshje të mbetura, kundër Fiorentinës, Atalantës, Milanit dhe Torinos, Roma e Ranierit ka ende shansin të sigurojë një vend në garën më të madhe evropiane për klube, duke i dhënë fund me krenari karrierës së gjatë të trajnerit italian.
“Thashë po, për një vit si trajner dhe pastaj si këshilltar i lartë. Nuk e di mirë as vetë çfarë është ajo”, ka shtuar ai me një dozë humori, duke lënë të hapur mundësinë e një roli të ri në klubin që gjithmonë ka pasur një vend të veçantë në zemrën e tij./rtk
