Kompanitë e telekomunikacionit kanë paralajmëruar se sabotimet e supozuara ruse ndaj kabllove nënujore mund të shkaktojnë ndërprerje të internetit në mbarë botën.
Ndërsa vazhdojnë akuzat për sulme të Rusisë ndaj kabllove nënujore, kompanitë më të mëdha të telekomunikacionit në Evropë i kanë bërë thirrje NATO-s që të “kundërshtojë” këto veprime, përcjell KosovaNews.
Në një letër të hapur të shkruar nga kompanitë, thuhet se ndikimi i ngjarjeve të tilla “shkon përtej Evropës”.
Sipas raportimit të PC Mag, kompanitë e telekomunikacionit i kanë bërë thirrje si NATO-s ashtu edhe liderëve të tjerë ushtarakë që të “bëjnë më shumë për të mbrojtur infrastrukturën nënujore të rajonit”. Kompanitë, përfshirë Telefónica, Vodafone dhe Orange (pronari i O2), kanë theksuar “rëndësinë e veprimit të përmirësuar dhe të koordinuar për të mbrojtur rrjetet ndërkufitare të Evropës, duke përfshirë incidentet në lidhje me kabllot nënujore në Detin Baltik dhe Detin e Veriut, si dhe rritjen e kërcënimeve hibride”.
THIRRJE E PËRBASHKËT E KOMPANIVE: INVESTONI NË TEKNOLOGJI TË AVANCUARA
Në letrën e përbashkët të kompanive thuhet se “ndikimi i dëmtimit të kabllove nënujore shkon shumë përtej Evropës”, duke paralajmëruar se sulmet e mundshme në të ardhmen “mund të ndikojnë në infrastrukturën globale të internetit dhe energjisë, komunikimet ndërkombëtare, transaksionet financiare dhe shërbimet kritike në mbarë botën”, transmeton KosovaNews.
Në deklaratë gjithashtu kërkohet nga NATO dhe liderët e tjerë ushtarakë që të kenë “shkëmbim të fortë informacioni dhe inteligjence”, duke kërkuar në këtë kontekst “iniciativa të përbashkëta monitorimi dhe mbikëqyrjeje” dhe duke bërë thirrje për “investime në teknologji të avancuara për të zbuluar dhe zbutur dëmtimin e kabllove nënujore”.
Në dokumentin e përmendur nuk përmendet asnjë “fuqi e jashtme” me emër, por Rusia pretendohet të jetë prapa një sërë ngjarjesh që kanë ndodhur gjatë vitit të fundit.
Së fundmi, në nëntor të vitit 2024, një anije kineze u rrethua nga disa anije të vendeve evropiane, dhe u pretendua se anija e përmendur po tentonte të sabotonte një kabllo optike nënujore në Detin Baltik.
Anija “Yi Peng 3”, e cila thuhej se ishte e mbushur me mallra ruse, kishte lëvizur për rreth 100 milje detare duke zvarritur spirancën e saj në fundin e detit. Në lidhje me këtë ngjarje është hapur një hetim dhe ka filluar verifikimi nëse ekuipazhit të anijes i ishte dhënë urdhër për të kryer këtë veprim me qëllim dëmtimin e kabllove./KosovaNews/
