Mijëra qytetarë po përballen me probleme në Kosovë, pasi të gjitha dokumentet origjinale të kadastrit janë marrë nga autoritetet serbe gjatë tërheqjes nga Kosova, me të përfunduar lufta në vitin 1999.
Edhe përkundër shumë tentimeve dhe negociatave të zhvilluara për vite për këtë çështje në Bruksel, Serbia ende nuk ka kthyer dokumentacionin kadastral të Kosovës, që e ka plaçkitur me rastin e humbjes së luftës.
Nevojën që t’i bëhet presion Serbisë për këtë çështje e ka shtruar sot në Kuvend deputeti Milazim Salihaj, i cili tha se me vonesat e deritashme janë shkaktuar shumë probleme si për qytetarët ashtu edhe për institucionet.
“Siç edhe e dimë të gjithë ne, Serbia gjatë luftës së vitit 1998/99, përpos që ka vrarë, dhunuar e masakru qytetarë të pafajshëm, e njëjta ka bërë edhe dëmtim dhe shkatërrim të pronës private e publike si dhe plaçkitje, e në mesin e të cilave edhe Dokumentacionin Kadastral. Pas humbjes së luftës në vitin 1999 dhe tërheqjes nga Kosova, autoritet serbe kanë plaçkitë dhe marrë me vete Dokumentacionet Origjinale të Kadastrës së Kosovës. Dokumentacioni Kadastral i plaçkitur dhe marrë nga Serbia ka shkaktuar dhe po shkakton probleme të shumta tek qytetarët dhe institucionet shtetërore. Mijëra qytetarë po përballen me çështje pronësore juridike në gjykata në mungesë të Dokumentacionit Kadastral Origjinal i cili është marrë në mënyrë të dhunshme nga Kosova në vitin 1999 dhe që nga ajo kohë ky dokumentacion Kadastral nuk iu është kthyer pronarit legjitim- Republikës së Kosovës dhe qytetarëve të saj”, ka thënë deputeti Salihaj.
Ai në fjalën e tij që mbajti në Kuvend shtoi se kthimi i regjistrave origjinal kadastralë është i domosdoshëm ngase aty kemi të bëjmë me regjistrat kadastralë të pronave private, pronave shoqërore, pronave komunale si dhe pronave publike e shtetërore.
Ky regjistër kadastralë i pronave përfshinë komunat; Prishtinë, Podujevë, Prizren, Gjilan, Pejë , Mitrovicë, Zveçan, Leposaviq, Zubin Potok, Rahovec, Skënderaj, Ferizaj, Kaçanik, Shtërpcë, Vushtrri, Deçan, Gjakovë, Istog, Lipjan, Viti, Kamenicë , Drenas, Klinë, Fushë-Kosovë, Novobërdë, Obiliq, Shtime, Suharekë dhe Dragash.
“Kjo çfarë ka ndodhur deri më tani është shqetësuese dhe e pa pranueshme, andaj Serbia duhet menjëherë dhe pa asnjë kusht të bëjë kthimin e Dokumentacionit Kadastral tek autoritetet Kosovare. Pavarësia e Kosovës është e pakthyeshme, dhe si i tillë Dokumentacioni Kadastral është pronë e Shtetit të Kosovës, i cili dokumentacion duhet t’i kthehet në pronësi Republikës së Kosovës dhe qytetarëve të saj”, ka thënë mes tjerash deputeti Salihaj.
