Ka përfunduar në Tiranë Samiti i Komunitetit Politik Evropian, ku morën pjesë dhjetëra liderë europianë dhe u zhvilluan një sërë tryezash dhe diskutimesh mbi sigurinë, energjinë dhe sfidat e përbashkëta.
Në konferencën përmbyllëse për shtyp, Kryeministri Edi Rama dhe Kryeministrja e Danimarkës, Mette Frederiksen, përcollën mesazhet kyçe të takimit.
Kryeministri Edi Rama theksoi se diskutimet në samit u përqendruan tek mbrojtja e vlerave dhe parimeve europiane, forcimi i bashkëpunimit mes vendeve anëtare dhe atyre jashtë BE-së, si dhe përfshirja më aktive në nisma politike dhe investime.
“Diskutuam për të investuar më shumë në iniciativa dhe fushata që i përkasin këtij komuniteti, edhe për vendet që nuk janë dhe nuk do të jenë pjesë e BE. Vendosëm të krijojmë një skuadër bashkërenduese të Komunitetit Politik Evropian nën kujdesin e Presidentit të Këshillit Evropian“, tha Rama.
Kryeministrja daneze Mette Frederiksen, e cila do të presë samitin e radhës në Hagë, theksoi nevojën e një Europe më të sigurt, duke e cilësuar Rusinë si kërcënim real jo vetëm për Ukrainën, por për të gjithë kontinentin.
“Siguria është prioriteti numër një. Rusia është kërcënim jo vetëm për Ukrainën, por për të gjithë ne, për shkak të sulmeve kibernetike, dezinformimit dhe përpjekjeve për të shkatërruar demokracitë tona. Riarmatimi duhet të jetë detyra më e rëndësishme e Evropës“, shtoi ajo.
Frederiksen theksoi se BE dhe SHBA janë në unison për sanksionet ndaj Rusisë, por Evropa duhet të jetë më e përgatitur edhe në mënyrë të pavarur.
“Nëse Rusia nuk pranon një armëpushim 30-ditor, sikurse ka bërë Ukraina, duhet të vijojnë sanksionet. Duhet të shohim me serioz sektorin bankar, energjinë, gazin, flotën dhe të ndërpresim varësinë nga hidrokarburet ruse.”
Ajo shtoi se për të garantuar një Evropë të sigurt, vendet anëtare duhet të rrisin ndjeshëm investimet në mbrojtje brenda NATO-s.
“Duhet të jemi në gjendje të mbrojmë veten brenda një kohe të shkurtër. Nuk mund të fitosh një luftë pa armë. Ne duhet të shpenzojmë më shumë jo për të luftuar, por për të parandaluar dhe mbrojtur.”
