Sekretari amerikan i Mbrojtjes, Pete Hegseth, kishte një lidhje interneti që anashkalonte protokollet e sigurisë së Pentagonit, të vendosur në zyrën e tij, për të përdorur aplikacionin e mesazheve Signal në një kompjuter personal, sipas dy personave të njohur me këtë linjë, të cilët folën për Associated Press.
Ekzistenca e kësaj lidhjeje interneti të pasigurt është zbulimi më i fundit në lidhje me përdorimin e aplikacionit të paklasifikuar nga Hegseth dhe ngre mundësinë që informacione të ndjeshme të mbrojtjes mund t’i jenë ekspozuar hakimit.
E njohur si një linjë interneti “e ndotur” nga industria e teknologjisë së informacionit, ajo lidhet drejtpërdrejt me internetin publik, ku të dhënat e përdoruesit dhe faqet e vizituara nuk i nënshtrohen të njëjtave filtra ose protokolle sigurie që ofrojnë lidhjet e mbrojtura të Pentagonit.
Edhe zyra të tjera të Pentagonit i kanë përdorur këto linja, veçanërisht kur është e nevojshme të monitorohen informacione apo faqe që ndryshe do të ishin të bllokuara. Por përparësia më e madhe e përdorimit të një linje të tillë është se përdoruesi nuk shfaqet si një nga adresat IP të caktuara për Departamentin e Mbrojtjes — në thelb, përdoruesi është i maskuar, sipas një zyrtari të lartë amerikan të njohur me sigurinë e rrjeteve ushtarake. Një linjë “e ndotur” — ashtu si çdo lidhje publike interneti — gjithashtu mund të mos përmbushë kërkesat për ruajtjen e të dhënave që kërkohen me ligj federal, shtoi zyrtari. Të tre personat folën në kushte anonimiteti për të diskutuar një çështje të ndjeshme.
