Për shkak të zjarreve që kanë përfshirë territorin e Komunës së Bujanocit në Serbi, është shpallur gjendje e jashtëzakonshme, raporton Anadolu, transmeton KosovaPost.
“Zjarri fillimisht ka filluar në Breznicë ndërsa më pas është përhapur drejt fshatrave përreth”, njoftoi Ali Asllani, shefi i Shtabit lokal për Situata të Jashtëzakonshme. Në shuarjen e zjarrit dhe parandalimin e përhapjes së zjarrit janë angazhuar ekipet e zjarrfikësve dhe shpëtimit nga Bujanoci dhe Vranja.
Ndërkaq, kryetari i Komunës së Bujanocit, Arbër Pajaziti njoftoi se Shtabi për Situata të Jashtëzakonshme i Komunës është mbledhur për të shqyrtuar situatën e krijuar nga zjarret në territorin e komunës.
“Për momentin, në territorin e Komunës së Bujanocit janë aktive disa vatra zjarri, ndër të cilat në zonën e Breznicës, Tërnocit, Verbani dhe Karadnikut. Të gjitha ekipet relevante janë të mobilizuara dhe në terren. Në përballimin e situatës janë angazhuar njësitë e zjarrfikësve, NP ‘Komunalia’, sektori i pyjeve, ekipet për mirëmbajtjen e rrugëve, pjesëtarë të Ushtrisë së Serbisë si dhe vullnetarë”, bëri të ditur ai.
Në disa lokacione zjarret janë nën kontroll ndërsa në zona të tjera ekipet vazhdojnë punën për lokalizimin dhe shuarjen e tyre, shtoi ai. Shtabi ka kërkuar gjithashtu mbështetje dhe angazhim shtesë nga komunat tjera, me qëllim të përforcimit të kapaciteteve në terren.
Ministri i Punëve të Brendshme të Serbisë, Ivica Daçiq, duke folur këtë mëngjes për zjarrin në rrethinë të Bujanocit, tha se zjarri ka përfshirë një sipërfaqe prej rreth 200 hektarësh.
